Khan afgreiddur í fjórum lotum

Hnefaleikaferill helstu stjörnu Breta, Amir Khan, er í miklu uppnámi eftir að hann tapaði fyrir Danny Garcia í fjórum lotum í Las Vegas í nótt.

Khan virtist vera í fínum málum þar til vinstri krókur í þriðju lotu sendi hann í strigann. Hann náði aldrei að jafna sig eftir það og var sleginn tvisvar niður í næstu lotu svo dómarinn varð að stöðva bardagann.

Khan er nú búinn að tapa tveim bardögum í röð og öll plön um að mæta sjálfum Floyd Mayweather næst virðast vera glórulaus.

"Þetta var ekki mitt kvöld en ég tek ekkert af Danny sem stóð sig vel og nýtti sín tækifæri í bardaganum. Ég var svolítið hissa á að dómarinn skildi stöðva bardagann en ber virðingu fyrir hans ákvörðun. Kannski var hún rétt," sagði Khan.