„Orkuþjóðin“ ætlar að stórauka raforkusölu til Evrópu

Norsk stjórnvöld telja að sala á raforku um sæstrengi til Evrópu geti orðið afar ábatasamur atvinnuvegur fyrir Noreg á næstu árum, og ætla sér að stórauka raforkuvinnslu og sölu. Jens Stoltenberg tilkynnti um þetta í ávarpi á ársfundi Samtaka atvinnulífsins í Noregi, NHO, þar sem hann flutti erindi auk olíumálaráðherrans, Ole Borten Moe, ásamt fleirum.

Stoltenberg sagði Noreg vera orkuþjóð, og að landið hefði skyldum að gegna gagnvart umheiminum á þeim forsendum. Orkumál væru áhugaverð, ekki síst þar sem umhverfismál væru stór hluti af þeim. Staðan í orkubúskap heimsins væri hins vegar með þeim hætti, að auka þyrfti orkuframleiðslu, en um leið að draga úr mengun og neikvæðum áhrifum á loftslag. „Þetta er stórt og mikið mál [...] Noregur getur lagt mikið til," sagði Stoltenberg, og vísaði til stórhuga hugmynda orkufyrirtækja í Noregi, m.a. Statkraft, um að leggja sæstrengi til Evrópu, þar á meðal þrjá strengi um Eystrasalt.

Nú þegar hefur fyrirtækið lagt streng frá Noregi til Hollands, sem reyndist miklu ábatasamari heldur en áætlanir gerðu ráð fyrir, þar sem miklu hærra verð fékkst fyrir raforkuna.

Á teikniborðinu eru allt að sex sæstrengir, á vegum Statkraft, og er uppbygging þeirra nú á hönnunar- og rannsóknarstigi. Horft er sérstaklega til vikjunar vatnsorku, vindorku og lífmassa í þessu samhengi.

Þá hyggjast Norðmenn á þessu ári bjóða út tvö ný leyfi til olíuleitar í norskri lögsögu, í Barentshafi og við Jan Mayen. Það verður í fyrsta skipti í nítján ár, eða frá því 1994, sem það verður gert en útboðið verður kynnt og talað fyrir því í norska Stórþinginu fyrir páska, að því er fram kom í máli Borten Moe.

Mikill uppgangur einkennir nú stöðu efnahagsmála í Noregi, og helst þar margt í hendur. Olíuiðnaðurinn hefur gengið vel, sjávarútvegur er í mikilli sókn og norska ríkið hefur stóraukið opinberar framkvæmdir, þar á meðal á sviði samgöngumannvirkja. Þar vegur ekki síst þungt að staða opinbera fjármála í Noregi er með allt öðrum hætti en hjá nánast öllum öðrum vestrænum ríkjum. Ríkissjóður Noregs er nánast skuldlaus, en með miklar skuldbindingar í gegnum víðtækt eignarhald á hinum ýmsum fyrirtækjum í norskuefnahagslífi, svo sem Statoil(68%), DNB (34%) og Norsk Hydro (40%). Þessu óviðkomandi er síðan norski olíusjóðurinn, en eignir hans eru metnar á tæplega 660 milljarða Bandríkjadala, eða sem nemur tæplega 85 þúsund milljörðum króna. Til samanburðar þá er landsframleiðsla á Íslandi um 1.620 milljarðar. Stærð sjóðsins nemur um 2,5 x árlegri landsframleiðslu Noregs, en eignir hans eru að 95 prósent leyti bundnar í eignum utan Noregs (sjá má pistil blaðamanns um stöðu mála í Noregi, hér).

Sjá má erindi Stoltenberg á fyrrnefndum fundi NHO hér. Erindi olíumálaráðherrans, Borten Moe, sem kom hingað til lands á dögunum, má sjá hér.