Málsóknir gegn 50 stjórnendum fallinna banka í Danmörku

Bankaumsýsla Danmerkur, Finansiel Stabilitet, ætlar að hefja málsóknir gegn 50 forstjórum og yfirmönnum í sex bönkum sem orðið hafa gjaldþrota á síðustu árum.

Mun bankaumsýslan krefja þessa menn um samtals 2,8 milljarða danskra króna eða rúma 60 milljarða króna í skaðabætur. Meðal bankanna sem hér um ræðir eru Hróarskeldubankinn og hinn færeyski Eik banki sem var skráður í kauphöllina hérlendis á sínum tíma.

Einnig er reiknað með að stjórnendur Amagerbankans bætist í þennan hóp innan skamms tíma.

Forstjóri bankaumsýslunnar segir að málsóknir þessar séu nauðsynlegar til að hindra að sagan endurtaki sig, að því er segir á vefsíðu börsen.