Actavis er komið inn á Fortune 500 listann

Actavis, Inc. hefur í fyrsta sinn komist á svo kallaðan Fortune 500 lista, sem gefinn er út af tímaritinu Fortune í Bandaríkjunum. Á listanum eru 500 stærstu bandarísku fyrirtækin, þegar miðað er við tekjur.

Í tilkynningu segir að eftir samruna Actavis Group og Watson Pharmaceuticals, Inc., undir nafni Actavis í október í fyrra, reyndust tekjur ársins 2012 vera um 5,9 milljarðar dollara, rúmlega 700 milljarðar króna. Það dugði til þess að koma fyrirtækinu í sæti 432 á lista ársins. Reiknað er með að tekjur yfirstandandi árs muni nema um 8,1 milljörðum dollara  sem svara til um 960 milljarða króna.

„Fortune500 gefur eina skýrustu vísbendinguna um það hvernig fyrirtæki standa sig og það skipar Actavis í hóp leiðandi og virtustu stórfyrirtækja að komast á listann. Þá er þetta einnig vitnisburður um dugnað og staðfestu allra 17.000 starfsmanna fyrirtækisins,“ segir Paul Bisaro forstjóri Actavis í tilkynningunni.