Árás á tölvuþrjóta: Íslenska lögreglan aðstoðar Microsoft og FBI

Íslenska lögreglan, ásamt lögregluyfirvöldum í 80 ríkjum, aðstoðaði tölvurisann Microsoft og bandarísku alríkislögregluna FBI í árás þeirra á einn stærsta glæpahring tölvuþrjóta í heiminum. Hringurinn gengur undir nafninu Citadel Botnets og er talinn hafa rænt um hálfum milljarði dollara, eða yfir 60 milljörðum  af bankareikningum undanfarna 18 mánuði.

Í frétt um málið á Reuters segir að sérstakri  glæpadeild Microsoft eða Digital Crimes Unit hafi í aðgerð þessari tekist að loka a.m.k. 1000 tölvunetum af um 1.400 sem tilheyrðu Citadel Botnets. Talið er að þessum tölvuþrjótum hafi tekist að brjótast inn í um 5 milljónir tölva á heimsvísu.

Meðal þeirra banka og fjármálastofnana sem Citadel Botnets tókst að brjótast inn í má nefna Citigroup, American Express, Bank of America, JPMorgan Chase, eBay, Paypal, Credit Suisse og Wells Fargo.

Reuters hefur eftir Richard D. Boscovich einum yfirmanna Digital Crimes Unit að “slæmu strákarnir munu finna fyrir þessu hnefahöggi í magann” eins og hann orðar það.

Fram kemur í frétt Reuters að íslenska lögreglan hafi komið við sögu í þessari aðgerð og aðstoðað Microsoft og FBI. Það sama á við um lögregluyfirvöld í 80 öðrum ríkjum í flestum heimsálfum. Hinar sýktu tölvur var að finna í Bandaríkjunum, Vestur-Evrópu, Hong Kong, Indlandi og Ástralíu. Sjá nánar hér.