Snjallrúm kynnt til sögunnar

Snjallrúm sem meðal annars fylgist með líkamsstarfsemi þinni á meðan þú sefur og gefur svefninum einkunn á morgnanna var kynnt á tæknisýningunni CES í Las Vegas í gær. Rúmið sem framleitt er af fyrirtækinu Sleep Number og heitir X12, kostar um 8.000 dali, eða um 928.000 krónur.

Frá þessu er sagt á vefnum Cnet.com.

Með því að ýta á sérstakan hnapp getur sá sem í rúminu sefur, hækkað undir höfuð maka síns, ef hann er að hrjóta. Rúminu er bæði hægt að stýra með fjarstýringu og raddstýringu. Einnig kvikna ljós undir rúminu þegar þú stendur upp úr því á næturnar.

Að auki er mögulegt að kaupa sérstök náttborð sem búa yfir hleðslustöðvum fyrir snjalltæki. Þrátt fyrir að búa yfir miklum tæknimöguleikum lítur rúmið ekki öðruvísi út en önnur rúm.