Meiri ókeypis hlustun á Spotify

Tónlistarveitan Spotify hefur brugðist við aukinni samkeppni með því að afnema takmarkanir á ókeypis hlustun gegn því að notendur veitunnar hlusti á auglýsingar.

Hingað til hafa notendur einungis notfært sér möguleikann að hlusta ókeypis gegn því að hlusta á auglýsingar í sex klukkustundir á dag. Hægt er að sækja Spotify smáforritið í snjallsíma og spjaldtölvur án endurgjalds.

Spotify kynnir þetta afnám takmarkananna rétt áður en ný tónlistarveita, sem heitir Beats, fer í loftið. Beats hefur vakið mikla athygli með auglýsingaherferð sinni en notendum stendur ekki til boða að hlusta án endurgjalds í eins langan tíma og Spotify býður upp á.

Spotify fékk aukna fjárinnspýtingu í nóvember í fyrra, þegar fjárfestar settu um þrjá milljarða aukalega í fyrirtækið. Aukin samkeppni er á tónlistaveitumarkaðinum – Beats og Rdio munu kynna þjónustu sína innan skamms.