Google og Ray-Ban vinna saman að Glass

Google slæst í lið með hönnunarfyrirtækinu á bak við Ray-Ban og Oakley. Tilgangurinn er sá að gera tæknina aðgengilegri fyrir almenning. BBC segir frá.

Luxottica, fyrirtækið á bak við Ray-Ban, gleraugnalínuna frægu hefur samið við tæknirisann Google um að hanna umgjarðir fyrir nýju gleraugnatölvuna Glass. 

Tilgangurinn er sá að hægt sé að markaðssetja vöruna til almennings. Forstjóri Luxottica, Andrea Guerra sagði samvinnu fyrirtækjanna geta haft í för með sér byltingarkennda nýja tækni. „Fyrstu tegundir tækisins munu sameina fyrsta-flokks tækni og framúrstefnulega hönnun," sagði Guerra.

Glass er örsmátt tæki í gleraugnalíki sem er með smágerðan glerskjá, en með því er hægt að taka ljósmyndir, kvikmynda, fá GPS-leiðbeiningar og fleira. Eins og stendur kostar tækið einhverja 1500 dollara, eða um 170.000 krónur, og er aðeins selt til ákveðins hóps prófunaraðila. Búist er við því að verðið lækki talsvert þegar varan kemur á almennan markað.