Ítalía aftur í kreppu

Efnahagsástand á Ítalíu bendir til þess að landið sé aftur komið í kreppuástand en þjóðarframleiðsla þar minnkaði annan ársfjórðunginn í röð. Á öðrum ársfjórðungi minnkaði virði vöru og þjónustu Ítala um 0,2% en á fyrsti ársfjórðungi ársins minnkaði hún um 0,1%.

Á seinni helmingi síðasta árs bentu tölur til þess að Ítalía væri að rétta örlítið úr kútnum og sást þá örlítill vöxtur í framleiðslu þeirra og þjónustu. Ítalía er stórskuldug og fyrir vikið þarf landið góðan vöxt í efnahagslífi landins til að komast úr skuldafeni sínu. Það virðist ætla að ganga hægt.

Þjóðarframleiðsla á Ítalíu hefur skroppið saman um 9% frá árinu 2007 og hefur kreppan sem skall á ári síðar leikið landið grátt. Þessar nýju tölur eru áfall fyrir forsætisráðherra landsins, Matteo Renzi, sem tók við embætti í febrúar síðastliðinn. Hann hefur lofað miklum efnahagsuppgangi, sem þó hefur látið á sér standa.