Þurfa að selja eignir til að rétta stöðu ríkissjóðs

Ekki er hægt að fara í frekari niðurskurð með góðu móti og mun því ríkisstjórnin bregða á það ráð að selja eignir til að bæta stöðu ríkissjóðs. Þetta kom fram í máli Bjarna Benediktssonar fjármálaráðherra við kynningu á fjárlögum fyrir árið 2015 í morgun. Bjarni nefnir sérstaklega hlut ríkisins í Landsbankanum í því samhengi.

Í gögnum frá fjármálaráðuneytinu, sem kynnt voru samhliða fjárlagafrumvarpinu í dag, kemur fram að nauðsynlegt sé að „hefja tiltekt á efnahagsreikningi ríkissjóðs með eignasölu og lækkun á skuldum.“

Þar segir einnig:

„Að óbreyttu tæki áratugi að greiða niður þær skuldir sem ríkissjóður stendur frammi fyrir og á sama tíma kæmi vaxtabyrðin í veg fyrir framlög til mikilvægra málaflokka.

Stefnt er að sölu á 30% eingarhlut í Landsbankanum á árunum 2015 og 2016 og verður andvirðið nýtt til að greiða niður lán sem tekin voru til að endurfjármagna fjármálastofnanir í kjölfar bankahrunsins.“

Gert er ráð fyrir lítlsháttar rekstarafgangi á ríkissjóði fyrir árin 2015 og 2016 en að hann muni svo aukast næstu árin þar á eftir. Í máli fjármálaráðherra, við kynningu á fjárlagafrumvarpinu kom fram að „meginvandi ríkissjóðs er gríðarlegar skuldir og verulega íþyngjandi vaxtajöfnuður.“

Af orðum Bjarna á kynningu fjárlaganna mátti merkja að lítið megi útaf bregða ef ríkissjóður eigi að vera hallalaus.

Háð því að rétt verð fáist fyrir hlutinn

Í samtali við Vísi segir Bjarni að þessar áætlanir ríkisstjórnarinnar, að selja hlutinn í Landsbankanum, séu háðar því að rétt verð fáist fyrir hlutinn. Þegar hann er spurður út í hvernig fyrirkomulagið á sölu hluts ríkisins í Landsbankanum verði háttað svarar hann svo:

„Það sem kemur inn í þá mynd er að lög hafa gert ráð fyrir því að bankasýslan myndi renna sitt skeið á þessu ári. Það mun þurfa lagabreytingu til að undirbúa það með hvaða hætti eigi að standa að sölu þessara eignarhluta. Sú undirbúningsvinna stendur yfir en við erum ekki að gera ráð fyrir sölu á Landsbankanum fyrr en í fyrsta lagi á seinni hluta næsta árs og síðan á árinu 2016. Samtals um í kringum 30% hlut. En það er auðvitað forsenda þess að af þessari sölu geti orðið að réttar aðstæður hafi skapast og rétt verð fáist fyrir hlutinn.“

Landsvirkjun ekki til umræðu

Er raunhæft – og pólitísk samstaða um sölu á einhverjum öðrum eignarhlutum ríkisins?

„Í fjárlögum er heimild til þess að selja hlut í öðrum fjármálafyrirtækjum. Um aðrar meiriháttar eignir ríkisins hefur mest lítið verið rætt. Þetta er nærtækasta dæmið (innsk: Landsbankinn) um eignir sem við getum selt til að greiða beint niður skuldir og í sjálfu sér verðmætasta eignin sem að við höfum í þeim tilgangi.“

Er inni í myndinni að selja hlut ríkisins í Landsvirkjun?

„Hann er ekki til umræðu núna.“