Ríkir Kínverjar flýja heimalandið

Tæplega helmingur kínverskra milljarðamæringa íhuga að flytja úr landinu innan næstu fimm ára í leit að betri menntunar- og atvinnutækifærum fyrir börn sín ef marka má nýja alþjóðlega könnun Barclays-bankans.

Af þeim rúmlega tvö þúsund milljarðamæringum sem spurðir voru eru þeir sem búa á meginlandi Kína líklegastir til þess að flytja en 47 prósent aðspurðra sögðust íhuga að stinga af, í samanburði við 16 prósent íbúa Hong Kong.

23 prósent íbúa Singapúr segjast vilja flytja innan fimm ára og eru þeir næstlíklegastir til að láta sig hverfa en fast á hæla þeirra fylgja um 20 prósent ofurríkra Breta. Bandaríkjamenn og Indverjar eru heimakærastir samkvæmt könnunni.

Algengasta ástæðan fyrir mögulegum brottflutningum var sögð vera betri tækifæri fyrir börn milljarðamæringanna (78 prósent svarenda), betra efnahagsástand (73 prósent) og betra heilbrigðiskerfi og velferð (18 prósent). Flestir Kínverjanna sögðust vilja flytja til Hong Kong, eða um 30 prósent svarenda.