Rússland í ruslflokk

Standard & Poor´s hefur fært lánshæfismat Rússlands niður í ruslflokk í fyrsta sinn í áratug. S&P gaf Rússlandi lánshæfismatseinkunnina BB+ og er Rússland þá komið niður í sama flokk og Indónesía og Búlgaría.

„Peningastefna Rússlands er orðin mun ósveigjanlegri og hagvaxtarspár eru verri, segir í yfirlýsingu frá S&P. Afleiðingin verður sú að Rússland mun eiga erfiðara með að sækja lán á alþjóðamörkuðum,‟ segir í yfirlýsingu S&P sem BBC vísar í.

Hagkerfið í Rússlandi hefur verið í frjálsu falli síðan um mitt síðasta ár, þegar olíuverð tók að lækka og ófriðurinn í Úkraínu varð til þess að Rússar voru beittir viðskiptaþvingunum.