Guðmann tæpur fyrir Evrópuleikinn á morgun

Óvíst er með þátttöku Guðmanns Þórissonar í Evrópuleik FH og Inter Baku á morgun.

Á blaðamannafundi sem FH boðaði til í hádeginu sagði Heimir Guðjónsson, þjálfari FH, að Guðmann sé að glíma við meiðsli í hásin og ekki sé útséð með þátttöku hans í leiknum.

Guðmann hefur verið talsvert frá vegna meiðsla í sumar og aðeins leikið fimm leiki í deild og bikar af þeim sökum.

Leikur FH og Inter Baku er í 2. umferð forkeppni Evrópudeildarinnar og hefst klukkan 19:15 annað kvöld. Seinni leikurinn er í Aserbaísjan, fimmtudaginn 23. júlí.