Margir telja að Hrútar fái Óskarstilnefningu

Aðstandendur kvikmyndarinnar Hrúta eru nú staddir í Telluride í Bandaríkjunum þar sem fram fer ein virtasta kvikmyndahátíð Bandaríkjanna.

Kvikmyndin var frumsýnd þar vestanhafs á föstudag við miklar undirtektir en rúmlega 100 manns þurftu frá að hverfa af fyrstu sýningu myndarinnar. Búið er að bæta við nokkrum sýningum á myndinni sem er ein sú vinsælasta og umtalaðasta á hátíðinni.

„Aðeins 27 myndir eru valdar til sýningar á hátíðinni þannig að það er mjög erfitt að komast hingað inn,” segir Grímur Hákonarson leikstjóri myndarinnar sem var í 3000 metra hæð yfir sjávarmáli þegar Vísir náði á hann. Allir miðar á hátíðina seldust upp í janúar síðastliðnum en þeir eru alla jafna að mjög skornum skammti enda er Telluride ekki nema rúmlega 2000 manna bær í austanverðu Colorado-fylki.

Hann segir að kvikmyndahátíðin í Telluride sé um margt ólík öðrum hátíðum sem Hrútar hafa ratað á. „Þeir í Telluride eru með stefnu um að upplýsa ekki um dagskrána fyrr en þú ert mættur. Þetta er svona hálfgerður leyniklúbbur,“ segir Grímur hæðinn.

Á hátíðina mæta fulltrúar frá  flestum stærstu kvikmyndaframleiðslufyrirtækjum Bandaríkjanna þannig að um er að ræða mikla „bransahátíð“.„Ég vil ekki vera með neinar yfirlýsingar en fólk sem er mikið inni í kvikmyndageiranum hérna í Bandaríkjunum er að tala um að hún eigi töluverða möguleika á að fá Óskarstilnefningu. Það kemur auðvitað bara í ljós. En fyrst þarf hún náttúrulega að vera valin sem framlag Íslands,“ segir Grímur.  

Aðspurður um hvað kunni að útskýra vinsældir myndarinnar á hátíðinni segir Grímur að þrátt fyrir að erfitt sé að skera úr um það nákvæmlega enda sé margt sem spili inni í. „Til að mynda þykir Bandaríkjamönnunum myndin framandi, þá sérstaklega bændamenningin og þessi ástríða fyrir sauðfénu. En þó er ákveðinn sammannlegur tónn í henni sem endurspeglast í bræðra- og fjölskylduerjunum.  Fólk tengir perónulega við þetta enda hafa margir gengið í gegnum svipaðar erjur,“ segir Grímur. „Ég held að það skemmi ekki heldur fyrir að það er töluverður húmor í henni en ekki bara endalaust volæði,“ bætir hann við.

Eftir hátíðina heldur Grímur með myndina til Kanada þar sem hún verður sýnd á stórri kvikmyndahátíð í Toronto en því næst mun myndin fara á „hátíðarúnt“ um Bandaríkin eins og Grímur kemst að orði.

Hrútar fara í almennar sýningar í bandarískum kvikmyndahúsum þann 6. Febrúar en það er afar sjaldgæft að kvikmyndir á öðrum tungumálum en ensku rati í bandarísk kvikmyndahús. „Þannig að það þykir dálítið góður árangur,“ segir Grímur stoltur.

Margir af fremstu stjörnum kvikmyndaheimsins eru nú staddar í Telluride, þeirra á meðal Danny Boyle sem fylgir á eftir kvikmynd sinni Steve Jobs sem og Meryl Streep sem fer með hlutverk í Suffragette.

„Við fórum á morgunsýningu á mynd sem heitir Black Mass sem er með Johnny Depp í aðalhlutverki og það er svona svolítið blóðug glæpamynd sem gerist í Boston. Maður er svolítið eftir sig enda skrýtið að sjá svona blóðuga mynd í morgunsárið. Það er verið að frumsýna hana hérna og á Feneyjarhátíðinni á sama tíma og það er mynd sem á alveg pottþétt eftir að fá Óskarstilnefningar,“ segir Grímur.

„Það eru allar myndirnar hérna, bæði þær bandarísku sem er verið að frumsýna sem og þær evrópsku, algjörar hágæðamyndir. Myndir sem eiga eftir að ná langt,“ bætir hann við. Hrútar eru því ekki í amalegum félagsskap.