Kínverskir skósalar kaupa Hamleys á 20 milljarða

Búið er að selja elstu leikfangaverslun heims Hamleys til kínverskru skósölukeðjunnar C.Banner International Holdings fyrir 100 milljónir punda, um 20 milljarða íslenskra króna. Bloomberg greinir frá.

Hamleys hefur verið í örum vexti síðustu ár undir stjórn framkvæmdastjórans Guðjóns Reynissonar en fyrirtækið hefur opnað yfir fimmtíu verslanir í þremur heimsálfum frá árinu 2008.



Seljandinn er franski leikfangaframleiðandinn Ludendo sem keypti Hamleys árið 2012, sem þá var í stærstum hluta í eigu slitabúa Kaupþings og Landsbankans. Kaupverðið voru 60 milljónir punda, um 12 milljarða íslenskra króna samkvæmt frétt The Guardian. Ludendo hefur því fengið góða ávöxtun á fjárfestingu sína á þeim þremur árum sem félagið átti Hamleys.



Hamleys, sem opnaði fyrstu verslunina árið 1760, var í eigu Baugs og Fons fram að hruni eða þar til félögin voru tekin til gjaldþrotaskipta árið 2009.