Þetta mót mikilvægt til að gera okkur klára fyrir stóra slaginn

„Það lítur út fyrir að það verði allir heilir og það er talsvert betri tilfinning en oft áður,“ segir landsliðsþjálfarinn Aron Kristjánsson en hann er vanur því að fara með laskað lið á stórmót. Ef allt gengur upp fer hann með sitt sterkasta lið til Katar og það yrði í fyrsta skipti sem hann stýrði liðinu með sína bestu menn.

„Þetta er mjög ánægjulegt en að sama skapi mjög langt síðan við spiluðum saman sem lið og við verðum að fínpússa leik okkar og fá tímasetningarnar í gang. Við erum að reyna að þróa okkur og athuga hvernig við getum nýtt okkar styrkleika sem best.“

Passað upp á Aron

Guðjón Valur Sigurðsson þurfti að yfirgefa landsliðið um tíma vegna persónulegra aðstæðna en vonast er til þess að hann komi aftur til móts við liðið um helgina.

Staða Arons Pálmarssonar er svo aftur á móti spurningarmerki eftir að hann varð fyrir fólskulegri árás í miðbæ Reykjavíkur milli jóla og nýárs. Hann fékk skurð fyrir ofan augað og er með brákað kinnbein.

„Við höfum verið að passa upp á hann en Aron tekur stærra skref með okkur með hverri æfingu. Við munum væntanlega nota hann eitthvað um helgina. Ef allt gengur að óskum þá munum við nota hann í einum eða tveimur leikjum. Það eru lítil ummerki á kinnbeini sem er gott en skurðurinn fyrir ofan augað þarf að gróa betur,“ segir Aron.

Hvílir menn í kvöld

Strákarnir okkar héldu utan í gær og í kvöld mæta þeir Svíum. Danir bíða á morgun og svo Slóvenar á sunnudag. Á þriðjudag heldur liðið svo til Katar frá Danmörku.

Aron mun halda að sér höndum í leiknum gegn Svíum í kvöld enda mætir Ísland liði Svía í fyrsta leik sínum á HM þann 16. janúar.

„Ég hugsa að ég hvíli svona fjóra menn sem verða í lykilhlutverki í Katar í leiknum gegn Svíum. Ég mun nýta 20 manna leikmannahópinn í kvöld til þess að gera alla klára og dreifa álaginu. Það eykur vonandi breiddina og hjálpar okkur að mæta öflugri til leiks á HM,“ segir landsliðsþjálfarinn en leikurinn í kvöld verður síðasta tækifæri einhverra leikmanna til að sanna sig því síðan verður hópurinn skorinn niður í 17 menn.

„Ég er að horfa til þess að taka 17 menn með til Katar og við ákveðum þann hóp eftir Svíaleikinn. Svo getur alltaf eitthvað komið upp en við bregðumst þá við því.“

Þó svo Ísland verði vonandi með sitt sterkasta lið á HM þá er liðið í óvenju erfiðum riðli þar sem Ísland komst inn bakdyramegin á mótið. Riðillinn sem spilað verður á móti í 16-liða úrslitum er líka svakalega sterkur þannig að verkefnið verður mjög krefjandi.

„Hjá okkur snýst þetta mikið um að einbeita okkur að okkur sjálfum. Ég held við séum á ágætri leið og nú verðum við að nýta þetta mót um helgina vel svo við mætum sem best undirbúnir í stóra slaginn.“

Framtíðarvörn landsliðsins

Þjálfarinn hefur verið að þróa nýja framliggjandi vörn. Hún gekk ekki sem skyldi gegn Þjóðverjum en verður þó ekki lögð til hliðar.

„6/0-vörnin okkar er og hefur verið okkar aðalvörn. Það verður engin breyting á því. Þessi nýja vörn líkist að mörgu leyti 6/0-vörninni. Við höfum oft lent í vandræðum gegn vissum liðum og þessi nýja vörn er ekki bara hugsuð fyrir HM heldur sem framtíðarverkefni. Við sjáum til hversu öflug hún verður eftir helgina til að geta metið hversu mikið við beitum henni í Katar. Í þessum varnarleik snýst um að vinna rétt. Það gekk vel á æfingum en skilaði sér ekki gegn Þýskalandi. Þetta er góð vörn að skipta í þegar hin vörnin gengur engan veginn,“ segir Aron Kristjánsson.