Manny kveður í apríl

Hnefaleikakappinn Manny Pacquiao hefur staðfest að bardagi hans í apríl verði sá síðasti á hans ferli.

Þá berst Pacquiao gegn Timothy Bradley í þriðja sinn á ferlinum. Þeir hafa unnið sitt hvorn bardagann. Bardaginn fer fram í MGM Grand Garden Arena í Las Vegas.

Pacquiao tapaði gegn Floyd Mayweather í síðasta bardaga sínum en sá bardagi fór fram í maí á síðasta ári.

Pacquiao er orðinn 37 ára gamall og búinn að berjast 65 sinnum. Hann hefur unnið 57 af þeim bardögum. Alls hefur hann unnið titla í átta þyngdarflokkum sem er met sem seint verður slegið.