Fleiri leikmenn á EM spila í Liechtenstein en í Pepsi-deildinni

Pepsi-deild karla á engan leikmann á Evrópumótinu í knattspyrnu í Frakklandi þrátt fyrir að þar verði 23 íslenskir leikmenn að spila undir merkjum íslenska landsliðsins í fótbolta.

Allir 23 leikmenn íslenska hópsins spila nefnilega með liðum utan Íslands og er Ísland aðeins eitt af þremur landsliðum í Evrópukeppninni sem er ekki með leikmann innanborðs sem spilar í heimalandinu.

Flestir íslensku leikmannanna spila á Norðurlöndunum eða 12 af 23 mönnum þar af eru sjö hjá sænskum liðum. Leikmenn íslenska liðsins dreifast samt vel um Evrópu enda spila þeir alls í ellefu löndum.

Hinar tvær þjóðirnar auk Íslands sem ekki eru með leikmenn frá liði í heimalandinu eru Írland og Norður-Írland. Allir Írarnir nema einn spila í ensku deildunum en sá eini sem sker sig úr er Robbie Keane sem spilar með LA Galaxy í Bandaríkjunum.

Það er aðeins meiri fjölbreytni hjá Norður-Írunum þó að 18 af 23 mönnum spili í Englandi. Fjórir leikmenn liðsins spila í Skotlandi og einn í Ástralíu.

Ensk lið eiga langflesta leikmenn eða alls 134 en 65 spila með þýskum liðum. Í þriðja sætinu eru síðan ítölsk lið sem eiga 56 leikmenn.

Meðal landa sem eiga fleiri leikmenn en íslenska Pepsi-deildin eru Aserbaídsjan, Kanada, Kína, Kasakstan, Sádí-Arabía og Liechtenstein.

Eini leikmaður sem spilar með liði frá Liechtenstein er Albaninn Armando Sadiku sem spilar með Vaduz.



Hér fyrir neðan má sjá í hvaða löndum leikmennirnir á EM spila.

134 - England (1 íslenskur)

65 - Þýskaland (2 íslenskir)

56 - Ítalía (2 íslenskir)

36 - Tyrkland

35 - Spánn

32 - Rússland (1 íslenskur)

22 - Frakkland (1 íslenskur)

21 - Úkraína

15 - Pólland

15 - Sviss (1 íslenskur)

13 - Tékkland

13 - Ungverjaland

10 - Króatía

10 - Portúgal

10 - Svíþjóð (7 íslenskir)

9 - Rúmenía

6 - Danmörk (2 íslenskir)

6 - Skotland

5 - Belgía (1 íslenskur)

5 - Grikkland

5 - Wales (2 íslenskir)    

4 - Slóvakía

3 - Búlgaría

3 - Noregur (allir íslenskir)

3 - Katar

2 - Albanía

2 - Austurríki

2 - Holland

2 - Bandaríkin

1 - Ástralía

1 - Aserbaídsjan

1 - Kanada

1 - Kína

1 - Ísrael

1 - Kasakstan

1 - Liechtenstein

1 - Mexíkó

1 - Sádí-Arabía

----

0 - Ísland

0 - Norður-Írland

0 - Írland