Dak hefur ekki tíma fyrir kærustu

Nýliðaleikstjórnandi Dallas Cowboys, Dak Prescott, er á allra vörum eftir ótrúlegt tímabil. Drengurinn er líka afar viðkunnalegur og hefur aðeins breytt ímynd félagsins.

Hans saga og leið á toppinn hefur verið erfið og hann hefur lagt mikið á sig. Hann missti móður sína er hann var í háskóla og hefur nýtt öll sín tækifæri í lífinu vel.

Prescott er sagður vera eftirsóttasti piparsveinninn í Dallas og hann var spurður út í kvennamálin í viðtali á dögunum.

„Þið kvenmenn þurfið mikinn tíma og öll mín einbeiting er á boltanum. Það er mín fyrsta ást,“ sagði Prescott um kvennamálin.

Hans lið verður í fríi um næstu helgi er úrslitakeppni NFL-deildarinnar hefst en allir leikir verða í beinni á Stöð 2 Sport.