Viggó samdi við WestWien

Handknattleikskappinn Viggó Kristjánsson er búinn að semja við austurríska félagið WestWien sem Hannes Jón Jónsson þjálfar.

Viggó spilaði með danska liðinu Randers í vetur. Randers endaði í neðsta sæti dönsku úrvalsdeildarinnar en Viggó skilaði þó sínu.

Hann skoraði 91 mark og var með 58 prósent skotnýtingu. Viggó mun deila skyttustöðunni hjá WestWien ásamt ungum, austurrískum leikmanni sem hefur verið viðloðandi landsliðið.

„Viggó er ungur og hefur mikla hæfileika. Hann er kraftmikill leikmaður,“ segir Hannes Jón við heimasíðu félagsins.