Ásdís: Markmiðinu náð

Ásdís Hjálmsdóttir komst í úrslit í spjótkasti á HM í frjálsum íþróttum sem fram fer í London en hún sagði markmiði sínu hafa verið náð í samtali við Kjartan Atla Kjartansson í kvöldfréttum Stöðvar 2.

„Þetta var markmiðið og ég er ógeðslega ánægð með að hafa náð því,“ sagði Ásdís.

Þriðja kast Ásdísar var mjög mikilvægt en strax eftir að hafa kastað spjótinu vissi hún að kastið hafi verið gott en hún kastaði 63,06 metra og tryggði sér sæti í úrslitunum. Fyrri köst Ásdísar voru upp á 59,53 metra og 57,28 metra.

„Já, ég vissi ekki að það væri svona langt en ég vissi að þetta hafi verið gott kast. Markmiðið fyrir síðasta kastið var að ná vinstri fætinum hraðar niður í síðasta skrefinu, til þess að fá betri spennu í gegnum líkamann. Ég var ekki búin að ná því nógu vel í köstunum á undan þannig að allur fókusinn var á að gera það. Það eina sem ég var að hugsa var bara niður með vinstri fótinn og svo næ ég að gera það nema að þá fer ég svo hratt yfir fótinn af því að hann fer svo hratt niður þannig að efri búkurinn kastast yfir og ég vissi ekki alveg hvernig svifið var á spjótinu. Svo leit ég upp og sá að ég gjörsamlega nelgdi það,“ sagði Ásdís glöð.

Erfitt var að sjá línurnar á vellinum frá brautinni og þegar að spjótið lenti var Ásdís ekki viss með niðurstöðuna og hún sagði það vera erfiðar sekúndur að bíða eftir niðurstöðunni á skjánum en þegar að niðurstaðan var ljós og Ásdís komin áfram segir hún að tilfinningin sé ólýsanleg.

„Það er eiginlega ekki hægt að lýsa því. Maður getur eiginlega ekki skilið þessa tilfinningu nema að maður sé búinn að ganga í gegnum það að leggja á sig alla þessa vinnu til þess að koma hingað í öll þessi ár og ná svo að gera það á réttum tíma,“ sagði Ásdís.

Ásdís setti sitt upphaflega Íslandsmet á Ólympíuleikunum árið 2012 en bætti það svo í Finnlandi fyrir stuttu en metið er sem stendur kast upp á 63,43 metra en kastið í gær er hennar næst lengsta kast á ferlinum.

 Pressan á stórmótum er gríðarlega mikil og í gær sérstaklega fyrir lokakastið hennar en Ásdís hugsar lítið út í það.

„Ég geri þetta aðeins öðruvísi, auðvitað er alltaf þessi pressa en mér finnst það alltaf vera hættulegt að ef þú lætur pressuna hafa of mikil áhrif á þig, þá ferðu að reyna of mikið og farið að rembast. Þegar að þú ert að kasta spjóti að þá er það einmitt það seinasta sem að þú vilt gera. Það er mjög mikilvægt að stýra spennustiginu rétt og ég náði að gera það í gær,“ sagði Ásdís.

Ásdís segir að markmiðið í úrslitunum sé það sama, að einbeita sér að frammistöðu heldur en niðurstöðu.

„Það er það sem ég geri yfirleitt þegar að ég er að keppa. Ég vissi ekki framan af hvað hinar voru að gera. Það var fyrir tilviljun að ég sá það út undan mér. Ég vissi að stelpurnar voru að kasta rosalega langt, enda er þetta sterkasta undankeppni á stórmóti nokkurn tímann í sögunni. Það hefur aldrei verið þannig að 62,26 metra kast hafi ekki dugað í úrslit. Ég er ekkert að fókusa á hinar því ég hef enga stjórn á því, það getur bara stressað mann upp. Það er þannig sem ég tækla þetta, bara að hugsa um að algjörlega að fókusera á mig sjálfa og það er þannig sem mér tekst að kasta langt,“ sagði Ásdís.

Ásdís segir undirbúninginn fyrir úrslitin ekki vera merkilegan.

„Ég er bara búin að vera að slaka á upp á hóteli, fór í léttan labbitúr áðan og svo er ég að taka æfingu hérna á eftir og kíki í gufu. Horfi svo á mótið með þjálfaranum mínum hér í kvöld, svo bara að reyna að sofa vel og borða vel. Á morgun tökum við létta virkni, í kringum hádegið áður en ég fer í hádegismat og svo förum við bara að gera okkur klár upp á völl,“ sagði spjótkastarinn, Ásdís Hjálmsdóttir að lokum frá London.