Elliott kominn í sama leikbannið í þriðja sinn á tímabilinu

Ezekiel Elliott, hlaupari Dallas Cowboys, er enn eina ferðina kominn í sex leikja bannið sem hann fékk fyrir tímabilið.

Þetta er í þriðja sinn sem hann er settur í þetta sex leikja bann en áfrýjanir hafa gert það að verkum að hann hefur getað spilað alla leiki Kúrekanna á tímabilinu.

Elliott getur áfrýjað enn eina ferðina og séð þar með til þess að hann fái að spila áfram. Fastlega er búist við því að hann geri það.

Leikmaðurinn var settur í þetta sex leikja bann vegna ásakanna um heimilisofbeldi. Hann hefur þó aldrei verið kærður fyrir ofbeldið.

Þetta mál mun því vafalítið halda áfram að fara í gegnum réttarkerfið á meðan Elliott heldur áfram að hlaupa eins og vindurinn fyrir Kúrekana.