Ungverskur Evrópuþingmaður ákærður fyrir njósnir fyrir Rússa

Saksóknarar í Ungverjalandi hafa ákært Evrópuþingmann Jobbik-flokksins fyrir að njósna um Evrópusambandið fyrir Rússa. Þingmaðurinn neitar sök og segir að ákæran hafi vísvitandi verið tímasett til að skaða flokk sinn í kosningum í vor.

Rannsókn á Bela Kovacs frá þjóðernisflokknum Jobbik hefur staðið yfir í tvö ár eftir að Evrópuþingið felldi friðhelgi hans sem þingmanns úr gildi. Saksóknarar segja að Kovacs sé meðal annars ákærður fyrir njósnir um Evrópusambandið, skjalafals og fjársvik.

Jobbik-flokkurinn hefur átt vaxandi vinsældum að fagna í skoðanakönnunum undanfarið. Hann mælist nú næststærsti flokkurinn á eftir Fidesz-flokki Viktors Orban forsætisráðherra, að því er segir í frétt breska ríkisútvarpsins BBC.

Kovacs telur að ákærunni sé ætlað að koma höggi á Jobbik fyrir kosningarnar. Hann hefur sagt sig úr flokknum til þess að reyna að draga úr skaðanum fyrir hann.