Segir Tyrkland enn stefna á Evrópusambandsaðild

Recep Tayyip Erdogan, forseti Tyrklands, ítrekaði í dag að Tyrkland muni ekki gefast upp á því markmiði að verða hluti af Evrópusambandinu. Forsetinn ræddi um samband ESB og Tyrklands í ræðu í dag þar sem hann kynnti stefnuskrá sína fyrir kosningarnar í næsta mánuði. Reuters greinir frá.

Eins og greint hefur verið frá samþykkti tyrkneska þingið skyndikosningar þann 24. júní næstkomandi. Erdogan sagði þær nauðsynlegar til að greiða fyrir upptöku forsetaræðis í Tyrklandi.

Tyrkland hóf aðildarviðræður við Evrópusambandið árið 2005 en þá höfðu liðið átján ár frá því að landið sótti fyrst um. Evrópuþingið samþykkti í nóvember árið 2016 að stöðva aðildarviðræður Tyrklands vegna aðgerða Tyrklandsstjórnar í kjölfar misheppnaðrar valdaránstilraunar þar í landi.

Erdogan fundaði með embættismönnum Evrópusambandsins í Varna í Búlgaríu í mars síðastliðnum. Meðal þess sem rætt var á þeim fundi voru hreinsanir Erdogan í Tyrklandi eftir valdaránstilraunina og kröfu Tyrklands um að öðlast aðgang að Evrópu án vegabréfsáritana. Erdogan sakaði jafnframt forsvarsmenn ESB um að leggja stein í götu Tyrklands.

Fyrir rúmu ári sagði forsetinn að Evrópusambandið væri fasískt og grimmilegt.