Þreyta og þörf á nýrri áskorun

Fótbolti Heimir Hallgrímsson tilkynnti það á blaðamannafundi sem hann hélt á Hilton í gær að hann væri hættur störfum sem þjálfari íslenska karlalandsliðsins í knattspyrnu. Heimir hefur starfað fyrir knattspyrnusambandið í sjö ár, en hann var fyrst um sinn aðstoðarmaður Lars Lagerbäck, síðar meðþjálfari Svíans og að lokum tók hann alfarið við keflinu eftir Evrópumótið sumarið 2016.

Heimir hefur á þessum tíma tekið þátt í umspili um laust sæti í lokakeppni HM 2014, farið með liðið í átta liða úrslit á EM 2016 og stýrt liðinu í lokakeppni HM í Rússlandi fyrr í sumar. Íslenska liðið var að taka þátt í lokakeppni bæði EM og HM í fyrsta skipti í sögunni. Eftir að hafa legið undir feldi í tæpar þrjár vikur ákvað Heimir að nú væri komið nóg og hann ætli að segja skilið við íslenska liðið.

„Íslenska karlalandsliðið í knattspyrnu er á besta stað sem það hefur verið hvað alla mælikvarða varðar í sögulegu samhengi. Það var komin ákveðin þreyta í mig og svo er ekkert launungarmál að ég var ekki sáttur við uppskeruna á HM í sumar. Ég er mikill keppnismaður og mér þótti eitt stig heldur rýr uppskera þó að ég gerði mér grein fyrir því að árangur væri alveg viðunandi. Við vorum ekki langt frá því að komast áfram í 16 liða úrslitin og ef það hefði tekist væri staðan mögulega önnur,“ sagði Heimir um aðdragandann að ákvörðun sinni í samtali við Fréttablaðið.

„Mér flaug í huga að semja einungis fram yfir Þjóðadeildina, en varð fljótlega afhuga þeirri ákvörðun. Mér fannst ósanngjarnt að sá sem tæki við í framhaldinu fengi lítinn tíma og enga vináttulandsleiki til þess að búa sig undir undankeppni EM 2020. Ég vildi ekki festa mig til þriggja ára og þetta er því niðurstaðan,“ sagði Heimir enn fremur um þær viðræður sem áttu sér stað á milli hans og KSÍ.

„Það fóru í raun aldrei eiginlegar samningaviðræður í gang og þetta snerist ekki um laun. Það fór bara saman að það var farið að gæta ákveðinnar þreytu hjá mér og að mig langaði að taka nýja áskorun einhvern tímann á næstunni. Það hafa borist einhverjar fyrirspurnir að utan, en ekkert sem er fast í hendi. Nú ætla ég bara að uppfæra menntun mína og þekkingu og skoða svo hvað mér býðst. Ég á einnig mánuð eftir af samningi mínum við KSÍ og mun aðstoða þau í þeirri vinnu sem er fram undan, að fara yfir og setja á fast form þær upplýsingar og þekkingu sem ávannst í Rússlandi,“ sagði Heimir enn fremur um starfslokin.