Dez Bryant samdi við Dýrlingana

Hið frábæra lið New Orleans Saints í NFL-deildinni varð enn betra í gær þegar útherjinn Dez Bryant samdi við félagið.

Hann var í herbúðum Dallas Cowboys en var sendur frá félaginu eftir síðasta tímabil. Þó svo hann hafi getað valið úr tilboðum hefur Bryant beðið rólegur á hliðarlínunni eftir rétta tilboðinu.

Það kom svo frá Saints og Bryant stökk á það. Samningurinn er til eins árs en Bryant vill sanna sig upp á nýtt með Saints og sjá svo til hvað hann gerir næsta vetur.

Saints er heitasta liðið í NFL-deildinni. Er búið að vinna sjö leiki í röð og um síðustu helgi voru Dýrlingarnir fyrstir til þess að leggja LA Rams að velli. Sókn liðsins er ógnvekjandi og hún mun ekki veikjast við að fá Bryant inn.