Tæklaði lukkudýr Patriots upp á sjúkrahús | Myndband

Flytja þurfti drenginn sem var að leika lukkudýr New England Patriots, Pat Patriots, í gær á sjúkrahús eftir að brandari leikmanns NY Jets gekk aðeins of langt.

Nú eru margir bestu leikmenn NFL-deildarinnar staddir í Orlando til þess að taka þátt í hinum árlega Pro Bowl-leik. Í tengslum við leikinn taka leikmenn þátt í alls konar keppnum og lukkudýrin eru með í för.

Jamal Adams, varnarmaður NY Jets, ákvað að sprella aðeins fyrir fólkið sem var að fylgjast með fjörinu. Hann ákvað að tækla lukkudýrið sem allir voru að baula á enda Patriots ekki vinsælasta félagið.

„Það voru allir að baula og ég ákvað því að sprella aðeins og tækla hann. Ég fór ekkert fast í hann og ég ætlaði aldrei að meiða hann. Ég var bara að leika mér,“ sagði Adams en lukkudýrið meiddi sig talsvert og fór upp á sjúkrahús.

This one is for every Patriots hater out there! I got y’all! pic.twitter.com/q0WAbDfrpL

— Jamal Adams (@TheAdamsEra) January 24, 2019

Ekki hafa borist neinar fréttir af meiðslunum. Aðeins er vitað að drengurinn í búningnum fór á spítala.

Adams mun væntanlega nota fyrsta tækifæri til þess að biðja hann afsökunar.