Morðinginn í Darwin notaði ólöglega haglabyssu

Ástralska lögreglan segir að karlmaður sem er talinn hafa myrt fjóra og sært nokkra til viðbótar í borginni Darwin í gær hafi notað ólöglega haglapumpu við árásina. Grunur leikur á að maðurinn hafi leitað að ákveðnum einstaklingi.

Maðurinn hefur ekki verið nafngreindur af yfirvöldum þó að fjölmiðlar hafi nefnt hann. Hann er sagður 45 ára gamall og kunnur lögreglunni. Eftir skothríðina flúði hann vettvang en lögreglumenn höfðu hendur í hári hans um klukkustund síðar.

Breska ríkisútvarpið BBC hefur eftir lögreglunni að maðurinn hafi verið laus úr fangelsi til reynslu og hafi verið með rafrænt eftirlitsmerki á sér þegar hann framdi ódæðið. Hann hafi verið búinn að afplána fjögur ár af sex ára fangelsisdómi.

Árásarmaðurinn kom við á nokkrum stöðum í Darwin og skaut á fólk, þar á meðal vegahóteli þar sem hann skaut einn til bana. Hann er sagður hafa skotið á fólk í nokkrum herbergjum þar áður en hann flúði á bíl. Vitni segja að hann hafi leitað að nafngreindum manni og lögreglan hefur staðfest það.

Skotvopnið sem maðurinn notaði var ólöglega haglapumpa með hlaupvíddina tólf. Yfirmaður lögreglunnar í Norðursvæði Ástralíu segir að byssunni gæti hafa verið stolið fyrir allt að 22 árum. Byssan er ein þeirra sem hefði átt að afhenda yfirvöldum eða eyða þegar ríkisstjórn Ástralíu hóf herferð til að fækka skotvopnum eftir verstu skotárás í sögu landsins árið 1996. Þá voru 35 manns skotnir til bana í Port Arthur í Tasmaníu.