Upphitun: Er hægt að stoppa Hamilton?

Níunda umferðin í Formúlu 1 fer fram á Red Bull brautinni í Austurríki um helgina. Fimmfaldi heimsmeistarinn, Lewis Hamilton, gæti með sigri aukið forskot sitt í mótinu í rúm 40 stig.

Liðsfélagi Hamilton, Valtteri Bottas, er annar og þarf því engan að undra að Mercedes er langefst í keppni bílasmiða.

,,Það kom mér mjög á óvart hversu langt á undan við erum’’ sagði Toto Wolff, liðsstjóri Mercedes, eftir fyrstu keppnir tímabilsins. ,,Ferrari var sterkara liðið í æfingum fyrir tímabilið, því kom þetta okkur verulega á óvart’’.

,,Lewis sá allra besti’’

Nú í vikunni hefur Wolff hrósað aðal ökumanni sínum hástert. ,,Lewis fær ekki þá virðingu sem hann á skilið, sérstaklega í Bretlandi. Þegar hann hættir verður hans minnst sem einn besti ökuþór allra tíma’’.

Á pappírum vantar Hamilton tvö met, fjöldi titla og fjöldi sigra. Michael Schumacer vann alls 7 titla og 91 keppni, Bretanum vantar því tvo titla og tólf sigra.

Samningur Hamilton hjá Mercedes lýkur eftir næsta tímabil, því gæti það vel gerst að magnaði Bretinn jafni eða jafnvel slái þessi met til að gerast sá allra besti.

 

Red Bull á heimavelli

Austurríska liðið stefnir á góð úrslit á Red Bull brautinni um helgina. Líklegt er að Max Verstappen verði í slagnum um verðlaunasæti en liðsfélagi hans, Pierre Gasly, verður að bæta sig.

Frakkinn kom nýr inn í liðið fyrir þetta tímabil en lítið hefur gengið hjá Gasly til þessa. Til að mynda endaði hann tíundi í heimakeppni sinni í Frakklandi um síðustu helgi.

Red Bull er þekkt fyrir að hafa litla þolinmæði gagnvart ökumönnum sínum og margoft hefur liðið rekið ökumenn um mitt tímabil.

Að vanda verða æfingar, tímatökur og kappaksturinn sjálfur í beinni útsendingu á Stöð 2 Sport um helgina. Kappaksturinn byrjar klukkan 12:50 á sunnudaginn.