Róbert Wessman í stjórn japansks lyfjafyrirtækis

Róbert Wessman, forstjóri Alvogen og stjórnarformaður Alvotech, var í vikunni kjörinn í stjórn japanska lyfjafyrirtækisins Fuji Pharma en japanska fyrirtækið á 4,2% hlut í Alvotech. Þetta kemur fram í tilkynningu frá Alvogen.

Róbert segir það spennandi verkefni að setjast í stjórn Fuji Pharma. „Það er ánægjulegt að fá tækifæri til þess að setjast í stjórn fyrirtækisins og styðja þannig enn frekar við samstarf okkar. Fyrir Alvotech eru það talsverð tíðindi að japanskt lyfjafyrirtæki sjái tækifæri í að fjárfesta í íslensku líftæknifyrirtæki og treysta okkur fyrir þróun og framleiðslu lyfjanna fyrir japansmarkað. Við erum þakklát fyrir það traust og með stjórnarsetu minni hjá Fuji Pharma munu hagsmunir fyrirtækjanna tengjast enn frekar,“ segir Róbert.

Alvotech og Fuji hafa undanfarið átt í miklu samstarfi um markaðssetningu líftæknilyfja Alvotech í Japan. Fyrr á árinu fjárfesti Fuji Pharma í Alvotech fyrir um 50 milljónir Bandaríkjadala en fyrirtækið er skráð í kauphöllina í Tókíó.

Þá fjárfesti Alvogen nýlega í Fuji Pharma og er nú þriðji stærsti hluthafi fyrirtækisins í gegnum dótturfyrirtæki sitt í Taiwan, með um 4% eignarhlut.

Ný stjórn fyrirtækisins, með Róbert Wessman innanborðs var kynnt á hluthafafundi fyrirtækisins í Tókíó í vikunni