Arion og Landsbankinn lækka vexti

Bæði Arion banki og Landsbankinn hafa lækkað vexti sína í nokkrum lánaflokkum, en Íslandsbanki gerði slíkt hið sama fyrr í vikunni. Allir stóru bankarnir þrír hafa þannig brugðist við stýrivaxtalækkun Seðlabankans í liðinni viku.

Íslandsbanki reið á vaðið á þriðjudag og tilkynnt um lækkun á vöxtum húsnæðis-, bíla- og innlána. Arion greindi frá vaxtalækkun sinni í gær og Landsbankinn tilkynnti um vaxtabreytingar sínar nú í morgun.

Sjá einnig: Bankarnir boða breytingar á vöxtum

Vaxtabreytingar Arion banka tóku gildi í gær og eru sem hér segir:

• Óverðtryggðir breytilegir íbúðalánavextir vextir lækka um 0,29% og verða 5,49%
• Bílalán og bílasamningar lækka um 0,25%
• Almennir óverðtryggðir kjörvextir lækka um 0,10%
• Yfirdráttarvextir og vextir greiðsludreifinga lækka um allt að 0,25%.
• Hvað innlán varðar þá munu breytilegir innlánsvextir bankans í mörgum tilfellum haldast óbreyttir þrátt fyrir stýrivaxtalækkun en þó munu vextir nokkurra innlánareikninga lækka um 0,05%-0,25%.

Á vef Landsbankans má sjá að fyrirhugaðar vaxtabreytingar bankans munu taka gildi frá og með deginum í dag. Þær eru svohljóðandi:

• Fastir vextir óverðtryggðra íbúðalána til 36 og 60 mánaða lækka um 0,25 prósentustig.
• Breytilegir óverðtryggðir vextir lækka almennt um 0,05-0,25 prósentustig.
• Breytilegir vextir óverðtryggðra íbúðalána lækka um 0,10 prósentustig.
• Breytilegir vextir bíla- og tækjafjármögnunar lækka um 0,10 prósentustig og yfirdráttarvextir lækka um 0,25 prósentustig.
• Innlánsvextir almennra veltureikninga og verðtryggðir vextir eru óbreyttir. Aðrir innlánsvextir standa ýmist í stað eða lækka um 0,05-0,25 prósentustig.

Hægt er að nálgast greinagóðar upplýsingar um vaxtakjör hjá bönkum og lífeyrissjóðum á húsnæðislánum á heimasíðum á borð við aurbjorg.is og herborg.is.