Einkunnir Íslands eftir jafnteflið í Istanbúl: Miðverðirnir bestir

Ísland og Tyrkland gerðu markalaust jafntefli á Türk Telekom vellinum í Istanbúl í H-riðli undankeppni EM 2020 í kvöld.

Ísland á því ekki lengur möguleika á að enda í öðru af tveimur efstu sætum H-riðils. Íslenska liðið á samt enn möguleika á að komast á EM í gegnum umspil á næsta ári.

Hörður Björgvin Magnússon komst næst því að skora fyrir Ísland undir lok leiks en Merih Demiral bjargaði á línu frá honum.

Tyrkir voru annars meira með boltann og stjórnuðu ferðinni. Boltinn fór tvisvar í slá íslenska marksins og Burak Yilmaz skallaði yfir úr dauðafæri í fyrri hálfleik.

Miðverðirnir Kári Árnason og Ragnar Sigurðsson stóðu upp úr í íslenska liðinu sem mætir Moldóvu í lokaleik sínum í undankeppninni á sunnudaginn.

Einkunnagjöf Vísis má sjá hér fyrir neðan.

Byrjunarliðið:

Hannes Þór Halldórsson, markvörður 6

Tyrkir áttu nokkur hættulítil skot sem Hannes varði örugglega. Greip vel inn í.

Guðlaugur Victor Pálsson, hægri bakvörður 6

Sinnti varnarskyldunum að mestu vel en skilaði boltanum ekki nógu vel frá sér. Fékk fínt færi í uppbótartíma en skaut í varnarmann.

Kári Árnason, miðvörður 7

Öruggur í hjarta íslensku varnarinnar. Bjargaði frábærlega í upphafi seinni hálfleiks þegar hann skallaði aukaspyrnu Hakans Çalhanoglu frá.

Ragnar Sigurðsson, miðvörður 7

Grjótharður í vörninni og lét finna vel fyrir sér. Öruggur og ákveðinn.

Ari Freyr Skúlason, vinstri bakvörður 6

Nokkuð öruggur í vörninni, sérstaklega í fyrri hálfleik, en hefur oft tekið meiri þátt í sókninni.

Jón Daði Böðvarsson, hægri kantmaður 5

Átti nokkra ágæta spretti en hefur oft leikið betur og verið beittari. Vinnusamur að vanda. Byrjaði á hægri kantinum en færði sig í fremstu víglínu eftir að Alfreð Finnbogason meiddist.

Birkir Bjarnason, miðjumaður 7

Náði ekki sömu hæðum og gegn Frakklandi í síðasta mánuði en var mjög traustur, vinnusamur og hjálpaði vörninni mikið.

Gylfi Þór Sigurðsson, miðjumaður 6

Hefur oft leikið betur. Komst lítið í takt við leikinn. Betri í fyrri hálfleik en þeim seinni þar sem hann komst ekkert í boltann. Lagði besta færi Íslands upp fyrir Hörð Björgvin.

Arnór Ingvi Traustason, vinstri kantmaður 5

Vinnusamur en skapaði litla hættu í sókninni. Stöðvaði skyndisókn Tyrkja með frábærri tæklingu í upphafi seinni hálfleiks. Meiddist og fór af velli eftir rúmlega klukkutíma.

Alfreð Finnbogason, framherji 5

Meiddist illa eftir rúmlega 20 mínútur og fór úr axlarlið. Hafði ekki náð að setja mark sitt á leikinn fram að því.

Kolbeinn Sigþórsson, framherji 6

Vann fullt af skallaboltum en það kom lítið út úr því. Vantaði stuðning og þjónustu. Sýndi aðdáunarverðan dugnað.

Varamenn:

Arnór Sigurðsson - 5 (Kom inn fyrir Alfreð á 24. mínútu)

Komst ekki í neinn takt við leikinn og var lítið í boltanum. Komst í ágætis skotfæri í seinni hálfleik en setti boltann í varnarmann.

Hörður Björgvin Magnússon - 6 (Kom inn fyrir Arnór Ingva á 63. mínútu)

Fékk besta færi Íslands þegar Demiral bjargaði á línu frá honum. Sterkur í loftinu.

Mikael Anderson - (Kom inn fyrir Ara Frey á 85. mínútu)

Kom inn af krafti í sínum fyrsta keppnisleik með landsliðinu. Lék of lítið til að fá einkunn.