Mótanefnd Knattspyrnusambands Íslands hefur staðfest tímasetningar leikja í 32 liða úrslitum Mjólkurbikars karla en dregið var í beinni á Stöð 2 Sport á laugardaginn var.
Þetta er fyrsta umferð Mjólkurbikarsins í ár þar sem Pepsi Max deildarliðin koma inn í keppnina en barist var um tuttugu laus sæti í aðalkeppninni í fyrstu tveimur umferðunum.
Drátturinn fór þannig að það verður enginn Pepsi Max deildar slagur í 32 liða úrslitunum í ár. Lið Vals og KR lentu þannig á móti liðum Skautafélags Reykjavíkur (Valur) og Vængjum Júpíters (KR) svo eitthvað sé nefnt.
Leikirnir í 32 liða úrslitunum fara fram frá þriðjudeginum 23. júní til fimmtudagsins 25. júní. Sex leikir eru á þriðjudeginum, átta leikir eru á miðvikudeginum og loks tveir leikir á fimmtudeginum.
Sjónvarpsleikir umferðarinnar hafa jafnframt verið ákveðnir, en fimm leikir verða í beinni útsendingu á Stöð 2 Sport. Bæði Leiknisliðin verða sem dæmi í beinni á miðvikudagskvöldinu.
Sjónvarpsleikir
- Þriðjudagurinn 23. júní
- Fram - ÍR á Framvelli klukkan 18.00
- Grótta - Höttur/Huginn á Vivaldivellinum klukkan 20.15
- Miðvikudagurinn 24. júní
- KA - Leiknir R. á Greifavellinum klukkan 18.00
- Stjarnan - Leiknir F. á Samsung vellinum klukkan 20.15
- Fimmtudagurinn 25. júní
- Breiðablik - Keflavík á Kópavogsvelli klukkan 19.15