Tólf ára strákur ákærður fyrir kynþáttaníð

Skoska lögreglan greindi frá því í dag að 12 ára strákur hefði verið ákærður fyrir hegðun sína á Celtic Park 29. desember en honum er gefið að sök að hafa sungið kynþáttaníðsöngva á grannaslag Celtic og Rangers.

„Við líðum ekki mismunun af neinu tagi og skoska lögreglan mun halda áfram að rannsaka hvert tilfelli þar sem að grunur leikur á mismunun, og draga þá sem bera ábyrgð fyrir viðeigandi dómstóla. Við viljum minna almenning á að hinn ákærði er undir 18 ára aldri og samkvæmt lögum má því ekki gefa upp nafn hans,“ sagði fulltrúi lögreglunnar við fjölmiðla.

Nikola Katic tryggði Rangers 2:1-sigur í umræddum leik en þetta var fyrsti sigur Rangers á Celtic Park síðan árið 2010. Alfredo Morelos, leikmaður Rangers, fékk rautt spjald fyrir leikaraskap seint í leiknum og Ryan Christie hjá Celtic var úrskurðaður í tveggja leikja bann í kjölfar leiksins eftir að í ljós kom að hann hefði gripið í klof Morelos.

Eftir sigurinn voru Rangers aðeins tveimur stigum á eftir Celtic en nú er munurinn orðinn sjö stig, þó að Rangers eigi reyndar leik til góða.