Alfreð hjálpaði landsliðsliðinu að fá aðstöðu i Augsburg

Landsliðsmaðurinn Alfreð Finnbogason er þegar búinn að gefa sína fyrstu „stoðsendingu“ fyrir íslenska karlalandsliðið í knattspyrnu í þessum landsleikjaglugga.

Íslenska karlalandsliðið í knattspyrnu mun hafa aðstöðu í Augsburg í Þýskalandi í aðdraganda umspilsleiksins á móti Ungverjalandi en þar geta strákarnir okkar tryggt sér sæti á EM.

Freyr Alexandersson fór yfir þetta á fjarfundi með blaðamönnum í dag þar sem aðstoðarlandsliðsþjálfarinn talaði frá Augsburg.

Freyr segir að þetta hafi verið hentugasta staðsetningin fyrir íslenska liðið þar sem hópurinn þarf að nýta allan tímann sem er í boði til að undirbúa liðið fyrir þennan mikilvæga leik.

Það eru öflugar flugsamgöngur til München sem hjálpar landsliðsmönnunum að komast sem fyrst til móts við hópinn.

Freyr sagði frá því að forráðamenn Augsburg liðsins hafi verið mjög jákvæðir fyrir því að taka á móti íslenska liðinu og hann þakkaði þeim kærlega fyrir það.

Það munaði miklu um það að landsliðsmaðurinn Alfreð Finnbogason er leikmaður Augsburg og var milligöngumaður í að tryggja íslenska liðinu þessa aðstöðu.

Freyr sagði að Alfreð átti sinn þátt í því að þetta gekk allt saman eftir.

Íslenska liðið mun því æfa í Augsburg þar til daginn fyrir leik þegar farið verið í stutt ferðalag til Búdapest þar sem leikurinn fer fram 12. nóvember.

Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.