Diego Maradona er látinn

Argentínski knattspyrnukappinn Diego Armando Maradona er látinn sextugur að aldri. Maradona lést af völdum hjartaáfalls. Þriggja daga þjóðarsorg hefur verið lýst yfir í Argentínu.

Maradona er af flestum talinn einn besti ef ekki besti knattspyrnumaður allra tíma. Hann varð heimsmeistari með Argentínu árið 1986 þar sem segja má að frægðarsól hans hafi skinið hvað skærast.

Á mótinu sem fram fór í Mexíkó skoraði Maradona sín frægustu mörk, í 2-1 sigri á Englandi í átta liða úrslitum keppninnar. Hið fyrra með hendi, hendi guðs eins og hann sagði sjálfur. 

Hið síðara eftir mikinn einleik.

Maradona leiddi argentínska landsliðið alla leið í úrslitaleikinn á HM á Ítalíu 1990. Segja má að hann hafi spilað á heimavelli í keppninni enda þáverandi leikmaður Napólí í samnefndri ítalskri borg í suðurhluta landsins. Með Napólí varð hann meðal annars tvívegis ítalskur meistari og vann UEFA-bikarinn. Hann er í guðatölu hjá félaginu sem hvorki fyrr né síðar hefur unnið ítalska meistaratitilinn.

Hann skoraði 34 mörk í 91 landsleik fyrir þjóð sína.

Gerðist þjálfari

Maradona spilaði með Argentinos Juniors, Boca Juniors, Napólí og Barcelona og átti aðdáendur um allan heim. Örvfætti smávaxni snillingurinn sneri sér að þjálfun síðar á ferlinum og stýrði meðal annars argentínska landsliðinu og landsliði Argentínu skipað leikmönnum yngri en tuttugu ára.

Reyndar kom Maradona nokkuð víða við sem þjálfari félagsliða, í heimlandi sínu, Saudí Arabíu og Mexíkó, en entist yfirleitt ekki lengi í starfi. 

Fjölmargir minnast fallinnar knattspyrnuhetju, þeirra á meðal Pelé og Gary Lineker sem skoraði mark Englands í 2-1 tapinu gegn Maradona og félögum 1986.

Maradona gekkst á dögunum undir aðgerð vegna blóðtappa í heila. Dr. Leopoldo Luque, læknir argentínska fótboltasnillingsins, sagði í viðtali þann 5. nóvember að aðgerðin hefði gengið vel.

„Hann hló, horfði á mig og tók í höndina á mér. Fyrstu viðbrögð eru jákvæð,“ bætti læknirinn við. Aðgerðin var framkvæmd á spítala í La Plata, fyrir utan höfuðborgina Buenos Aires. Til stóð að Maradona færi í kjölfar aðgerðarinnar í áfengismeðferð.

Umdeildur karakter

Hæfileikar Maradona voru óumdeildir en annað verður sagt um persónu hans og lífsstíl utan vallar. Hann féll á lyfjaprófi á HM í Bandaríkjunum 1994, þegar efedrín greindist í blóði hans, og var sendur heim með skömm. Áður, eða árið 1991, fékk hann 15 mánaða bann eftir að hafa orðið uppvís að neyslu kókaíns. Baráttan við kókaínfíknina setti dökkan svip á seinni hluta ferilsins.

„Ég var og er mjög hamingjusamur. Fótboltinn gaf mér allt sem ég á, meira en ég hefði getað ímyndað mér. Hefði ég ekki átt við þessa fíkn að stríða hefði ég getað spilað mun meira,“ sagði Maradona í nýlegu viðtali í dagblaðinu Clarín. 

Maradona flutti heim til Argentínu í fyrra og tók við þjálfun Gimnasia de La Plata sem leikur í efstu deild. Um komuna heim sagði hann við Clarín:

„Ég verð fólki ævinlega þakklátur. Hver dagur kemur mér á óvart, það sem ég hef upplifað frá því að ég sneri aftur í argentínska fótboltann mun ég aldrei gleyma. Það var betra en ég hefði getað ímyndað mér. Vegna þess að ég var lengi erlendis og stundum spyr maður sig hvort að fólkið haldi áfram að elska mann, hvort þeim líði áfram eins. Þegar ég sneri aftur á völlinn í Gimnasia daginn sem ég var kynntur fann ég að ást fólksins á aldrei eftir að hverfa.“

Þriggja daga þjóðarsorg

Alberto Fernández, forseti Argentínu, hefur lýst yfir þriggja daga þjóðarsorg í landinu. Hann sagði: „Þú komst okkur á topp tilverunnar. Þú gerðir okkur óendanlega glöð. Þú varst sá merkasti af þeim öllum. Takk fyrir að hafa verið til, Diego. Við munum sakna þín alla okkar ævi.“