Englendingar 42 ára og eldri geta nú skráð sig í bólusetningu

Á Norður-Írlandi hefur öllum 35 ára og eldri verið gefinn kostur á að skrá sig í bólusetningu og á Skotlandi er unnið að því að bjóða öllum 40 og eldri bólusetningu.

Sums staðar í Wales geta 30 ára og eldri nú þegar fengið bólusetningu.

Um 33,7 milljónir einstaklinga á Bretlandseyjum hafa fengið fyrri skammt af bóluefni gegn Covid-19 en næstum 12,9 milljónir eru fullbólusettir.

Bresk stjórnvöld stefna að því að ljúka bólusetningum fyrir júlílok og hvetja ákveðna hópa sérstaklega til að þiggja bólusetningu, það er þá sem eru í aukinni áhættu á að leggjast inn á sjúkrahús vegna kórónuveiruveikinda.

Þetta eru karlmenn, svartir og aðrir minnihlutahópar, fólk hvers líkamsmassastuðull er 30 eða meira og þeir sem búa við fátækt.

Þunguðum konum hefur verið ráðlagt að þiggja bólusetningu en helst með bóluefnunum frá Pfizer og Moderna, þar sem endanlegar niðurstöður rannsókna AstraZeneca liggja ekki fyrir.