Leið eins og Messi og táraðist við brottförina

Grealish ólst upp í Birmingham-borg og gekk í raðir Aston Villa sex ára gamall. Í dag er hann 25 ára gamall og færði sig um set fyrir breska metfjárhæð, 100 milljónir punda, til Manchester City í vikunni.

Grealish sat fyrir svörum á blaðamannafundi í dag og segir brottför sína frá Aston Villa vera líka þeirri hjá Lionel Messi frá Barcelona.

„Allir hafa séð hvernig Messi var á síðasta blaðamannafundi sínum. Það er nákvæmlega þannig sem mér leið sjálfum.“ sagði Grealish í dag. „Áður en ég yfirgaf hótelið talaði ég við liðsfélagana og starfsliðið og táraðist sjálfur.“

Messi gat ekki haldið aftur af tárum þegar hann hélt blaðamannafund í höfuðstöðvum Barcelona í gær en hann hefur yfirgefið félagið eftir 21 ár í Katalóníu.

Grealish sagði á fundinum að ákvörðunin að yfirgefa Aston Vill hafi verið ein sú erfiðasta sem hann hefur tekið á ævinni. Það hafi hins vegar verið kominn tími til að breyta til.