Barcelona reynir að losa sig við Coutinho

Samkvæmt frétt Daily mail er ítalska liðið Lazio mjög áhugasamt um að tryggja sér þjónustu Coutinho sem fær 200.000 pund á viku í laun hjá Barcelona. Ítalska liðið vill fá hann lánaðan á komandi tímabili með möguleika á að kaupa hann á 25 milljónir punda að ári liðnu. 

Barcelona er sagt tilbúið að borga helming launa Coutinho á móti Lazio en eins og komið hefur fram í fréttum að undanförnu á félagið í miklum fjárhagsvandræðum.

Samkvæmt frétt Daily Mail er búið að úthluta treyju númer 14 hjá Barcelona til hins unga Rey Manaj sem var færður í aðallið félagsins fyrir þetta tímabil. Coutinho hefur hingað til leikið í treyju númer 14 á ferli sínum hjá Barcelona.

Hvað Coutinho sjálfur vill er óljóst. Lazio, sem verður undir stjórn Maurizio Sarri í vetur, leikur í Evrópudeildinni en Coutinho vill leika í Meistaradeildinni.  Hann var á láni hjá Bayern tímabilið 2019-20 og hefur ekki náð sér á strik með Barcelona síðan hann gekk til liðs við félagið frá Liverpool í janúar 2018.