Benzema með þrennu er Real kom tví­vegis til baka og tyllti sér á toppinn

Santi Mina kom gestunum yfir strax á fjórðu mínútu en Karim Benzema jafnaði metin 20 mínútum síðar. Franco Cervi kom Celta í 2-1 og þannig var staðan í hálfleik. 

Benzema jafnaði metin eftir aðeins mínútu leik í síðari hálfleik og Vinicius Junior kom Real yfir í fyrsta skipti þegar síðari hálfleikur var tíu mínútna gamall.

Fyrst Benzema gat ekki skorað það mark þá lagði hann einfaldlega mark Vinicius upp. Það var svo nýi maðurinn, Eduardo Camavinga, sem skoraði fjórða mark Real en hann gekk í raðir félagsins á dögunum.

Undir lok leiks fengu heimamenn vítaspyrnu, Benzema fór á punktinn og skoraði þriðja mark sitt. Lokatölur því 5-2 Real Madríd í vil í þessum fyrsta alvöru heimaleik í meira en eitt og hálft ár.

Real fer með sigrinum á topp La Liga, spænsku úrvalsdeildarinnar, með 10 stig líkt og Valencia og Spánarmeistarar Atlético Madríd.