Biden segir Pútín hafa hitt ofjarl sinni í úkraínsku þjóðinni

Harðir bardagar standa yfir við og í borginni Kharkiv skammt frá landamærunum í norðaustur Úkraínu. Rússar skutu flugskeytum að Frelsistorginu í miðborginni í gær þar sem fjöldi óbreyttra borgara féll og miklar skemmdir urðu á stjórnarbyggingum og fleiri byggingum eins og óperuhúsinu.

Hart er einnig barist við hafnarborgina Mariupol norðaustur af Krímsskaga við Svartahaf þar sem Rússar segjast hafa náð höfninni og lestarstöðinni á sitt valda en heimamenn verjast af hörku. Þá hefur fjöldi manns fallið í borginni Khankiv þar sem rússneskir fallhlífarhermenn lentu í nótt eftir stöðugar loftárásir á borgina.

Volodymyr Zelenskyy forseti segir Rússa hafa farmið stríðsglæpi víðs vegar í Úkraínu með árásum sínum. Þá fordæmir hann misheppnaða eldflaugaárás á sjónvarps- og fjarskiptaturn Kænugarðs í gær en flugskeyti lentu á minnismerki um þá hundruð þúsunda úkraínskra gyðinga sem myrtir voru af nasistum í helförinni.

„Þetta er án allrar mannúðar. Slíkar eldflaugaárásir sýna að fyrir marga Rússa er Kíev algerlega framandi. Þeir vita ekkert um höfuðborgina okkar, um sögu hennar. Þeir hafa fyrirskipanir um að þurrka út sögu okkar, landið okkar og okkur öll," sagði Zelensky í ávarpi til þjóðarinnar í dag.

Sá fáheyrði atburður átti sér stað á breska þinginu í dag að allir þingmenn sem einn fögnuðu sendiherra Úkraínu sem fylgdist með þingfundi innilega. Boris Johnson forsætisráðherra tekur undir áskanir Úkraínuforseta um að Rússar hafi framið stríðsglæpi með árásum sínum.

„Það sem við höfum nú þegar séð frá stjórn Vladimírs Pútíns, hvað varðar notkun hergagna gegn saklausum borgurum, telst nú þegar stríðslæpur. Ég veit að saksóknari alþjóðlega stríðsglæpadómstólsins hefur þegar hafið rannsókn. Ég er viss um að allt þingið styður það,“ sagði Johnson við góðar undirtektir þingmanna.

Rússneskar árásarþyrlur sjást víða á flugi til stuðnings herflutningabílum, skriðdrekum og flugskeytaskotpöllum Rússa á jörðu niðri. Gríðarlega löng lest hernaðartækja hefur færst nær höfuðborginni Kænugarði en hermenn hafa enn ekki ráðist þar inn. Stórskotum og eldflaugum er þó skotið að borginni.

Joe Biden Bandaríkjaforseti sagði í stefnuræðu sinni, State of the Union, á Bandaríkjaþingi í gærkvöldi, að Putin væri ekki búinn að bíta úr nálinni með afleiðingar innrásarinnar.

„Hann hélt að hann gæti vaðið inn í Úkraínu og að heimurinn myndi leggjast flatur.  Í staðinn mætti honum sterkur múr sem hann sá ekki fyrir eða gat ímyndað sér. Hann mætti úkraínsku þjóðinni," sagði Biden við mikinn fögnuð þingmanna og annarra gesta við athöfnuna.

Bandaríkjaforseti greindi jafnframt frá því að Bandaríkjamenn hefðu fylgt bandamönnum í Evrópu og lokað fluglögsögu sinni fyrir Rússneskum loftförum. Hann sagði Putin og Rússa almennt eiga eftir að finna fyrir afleiðingum aðgerða vestrænna ríkja um langa framtíð.