Ingvi Hrafn gerði alvarlega atlögu að fórnarlambi sínu á Sushi Social, eins og sjá má á myndbandinu að neðan. Þar sést að hann rekur eggvopn ítrekað í hinn og hæfir upphandlegg hans að minnsta kosti einu sinni.
Af viðstöddum að dæma greip um sig mikill ótti á meðal fólks meðan á átökunum stóð. Komið hefur fram í máli veitingastjóra staðarins að slagsmálunum hafi lokið jafnskjótt og þau hófust.
Í dómi Héraðsdóms Reykjavíkur segir að í upptöku sem lögð var fyrir dóm sjáist greinilega að árásin hafi verið heiftúðleg, óhætt er að taka undir orð dómara miðað við myndskeiðið hér að ofan.
Fórnarlamb Ingva Hrafns hlaut fimm skurði í árásinni, þar af tvo sem náðu niður í vöðva. Samkvæmt skýrslu sérfræðings var árásin lífshættuleg, enda hefði fórnarlambi blætt út hefði það ekki leitað læknishjálpar tafarlaust.
„Viltu láta drepa mig, ha?“
Ingvi Hrafn gaf sig fram við lögreglu daginn eftir árásina og játaði brot sitt skýlaust fyrir dómi. Hann fór þó fram á sýknu og bar fyrir sig neyðarvörn fyrir dómi.
Hann lýsti atvikum sem svo að hann hefði farið til fundar við þann stungna á veitingastaðnum Sushi Social en nokkrar erjur hafi verið milli mannanna. Þeir hafi síðan farið að rífast og brotaþoli lagt hníf á borðið og sagst eiga byssu heima hjá sér.
Þá hafi hann orðið hræddur, staðið á fætur og spurt „viltu láta drepa mig, ha?“. Síðan hefði hann tekið hnífinn af borðinu og ráðist á brotaþola og stungið hann fjórum til fimm sinnum.
Brotaþoli kvaðst fyrir dómi ekki hafa tekið hníf með sér á fund þeirra en gekkst þó við því að stirrt hefði verið milli þeirra og að hann hafi hótað manninum „barsmíðum og hverju sem er“.
Í dóminum segir að ströngum skilyrðum þurfi að vera uppfyllt svo að árásaraðili sé leystur undan ábyrgð á grundvelli ákvæða laga um meðferð sakamála um neyðarvörn. Til þess þurfi ólögmæt árás, sem ætlað er að verjast, að vera yfirvofandi.
Þá segir að þar sem ósannað teljist að fórnarlambið hafi komið með hníf á fund mannanna og að ekki verði talið að hótunum fórnarlambsins í garð mannsins verði jafnað til yfirvofandi árásar, sé ekki unnt að fallast á málsástæðu hans um neyðarvörn.
Með vísan til þess og að óumdeilt sé að Ingvi Hrafn hafi framið árásina var hann sakfelldur fyrir stórfellda líkamsárás.
Langur sakaferill að baki
Við ákvörðun refsingar tók dómurinn mið af því að maðurinn á að baki sakaferil frá árinu 2012 og hefur síðan þá hlotið refsingu vegna ýmissa brota. Síðast í október síðastliðnum var Ingvi Hrafn dæmdur í þriggja ára fangelsi fyrir margvísleg brot.
Meðal annars fyrir að beina hlaðinni skammbyssu að fólki og lögreglumönnum við og nærri Kaffistofu Samhjálpar í júní síðastliðnum. Maðurinn hafði ekki skotvopnaleyfi, hann var með 24 skothylki og ekkert öryggi á byssunni.
Með þeim dómi voru teknar upp eftirstöðvar reynslulausnar sem honum var veitt árið 2018, samkvæmt þremur fyrri dómum. Alls 370 dagar.
Þar sem sá dómur féll eftir að líkamsárásin sem hér um ræðir var framin, ber að dæma manninum hegningarauka sem samsvari þeirri þyngingu hegningarinnar, sem kynni að hafa orðið, ef dæmt hefði verið um öll málin í fyrra málinu.
Dómurinn taldi jafnframt að alvarleiki árásarinnar og langur brotaferill Ingva Hrafns yrði metinn honum til refsinþyngingar. Því var hann dæmdur til fimmtán mánaða fangelsisvistar ofan á fyrri dóm.
Þá var Ingva Hrafni gert að greiða fórnarlambinu 500 þúsund krónur í miskabætur og 400 þúsund krónur í málskostnað auk málsvarnarlauna skipaðs verjanda síns og annars sakarkostnaðar, alls tæplega 1900 þúsund krónur.
