Sverrir og Jóhann snúa aftur í landsliðið

Arnar er með íslenska landsliðið í Suður-Kóreu eftir 1-0 tapið gegn Sádi-Arabíu á sunnudaginn, en Ísland mætir Suður-Kóreu á föstudaginn. Liðið í þeim leikjum er að stórum hluta skipað leikmönnum úr Bestu deildinni. 

Leikirnir í Baltic Cup eru hins vegar á FIFA-leikdögum svo að Arnar gat valið þá leikmenn sem hann vildi, og eru Sverrir og Jóhann með að þessu sinni. Guðlaugur Victor Pálsson og Alfreð Finnbogason gátu hins vegar ekki gefið kost á sér vegna meiðsla, að sögn Arnars.

Jóhann, sem leikið hefur 81 A-landsleik, lék síðast fyrir landsliðið í september í fyrra, í 4-0 tapinu gegn Þýskalandi í undankeppni HM. Hann hefur leikið fjórtán deildarleiki með Burnley í haust en liðið er á toppi ensku B-deildarinnar.

Fyrstu landsleikir Sverris síðan í mars 2021

Sverrir, miðvörður PAOK í Grikklandi, hefur ekki verið með landsliðinu síðan í mars 2021, í fyrstu leikjunum í undankeppni HM í Katar sem jafnframt voru fyrstu leikirnir undir stjórn Arnars. Sverrir á að baki 39 A-landsleiki.

Í Baltic Cup leika auk Íslands lið Eistlands, Lettlands og Litháens. Ísland mætir Litháen í undanúrslitum 16. nóvember og svo annað hvort Eistlandi eða Lettlandi 19. nóvember.

Hér að neðan má sjá landsliðshópinn.

Landsliðshópurinn:

Markmenn:

• Rúnar Alex Rúnarsson - Alanyaspor - 19 leikir
• Patrik Sigurður Gunnarsson - Viking FK - 1 leikur
• Elías Rafn Ólafsson - FC Midtjylland - 4 leikir

Varnarmenn:

• Alfons Sampsted - Bodo/Glimt - 13 leikir
• Hörður Björgvin Magnússon - Panathinaikos - 43 leikir, 2 mörk
• Daníel Leó Grétarsson - Slask Wroclaw - 11 leikir
• Davíð Kristján Ólafsson - Kalmar FF - 9 leikir
• Sverrir Ingi Ingason - PAOK - 39 leikir, 3 mörk
• Valgeir Lunddal Friðriksson - BK Häcken - 3 leikir

Miðjumenn:

• Aron Einar Gunnarsson - Al Arabi - 100 leikir, 2 mörk
• Aron Elís Þrándarson - OB - 15 leikir, 1 mark
• Arnór Sigurðsson - IFK Norrköping - 23 leikir, 2 mörk
• Stefán Teitur Þórðarson - Silkeborg IF - 13 leikir, 1 mark
• Ísak Bergmann Jóhannesson - FC Köbenhavn - 15 leikir, 2 mörk
• Þórir Jóhann Helgason - Lecce - 14 leikir, 2 mörk
• Birkir Bjarnason - Adana Demirspor - 112 leikir, 15 mörk

Kant- og sóknarmenn:

• Hákon Arnar Haraldsson - FC Köbenhavn - 5 leikir
• Jón Dagur Þorsteinsson - OH Leuven - 23 leikir, 4 mörk
• Mikael Neville Anderson - AGF - 16 leikir, 2 mörk
• Mikael Egill Ellertsson - Spezia Calcio - 8 leikir
• Jóhann Berg Guðmundsson - Burnley - 81 leikur, 8 mörk
• Sveinn Aron Guðjohnsen - IF Elfsborg - 16 leikir, 1 mark
• Andri Lucas Guðjohnsen - IFK Norrköping - 11 leikir, 2 mörk

„Mikill heiður fyrir okkur að fá boð“

Arnar landsliðsþjálfari segir á vef KSÍ að stefnan sé sett á sigur á Baltic Cup.

„Mér líst mjög vel á þetta Baltic Cup verkefni, frábært að fá mótsleiki í stað vináttuleikja. Eins og við vitum þá breytir það alltaf leikjunum ef það er að einhverju að keppa. Mér skilst að þetta sé mót sem var fyrst haldið fyrir hátt í hundrað árum og það er bara mikill heiður fyrir okkur að fá boð frá þessum vinaþjóðum okkar um þátttöku sem gestalið.

Það hefur verið stígandi í okkar leik. Við ætluðum okkur auðvitað að vinna riðilinn í Þjóðadeildinni en fyrst það tókst ekki þá var mikilvægt að ná öðru sætinu upp á framhaldið að gera. Ég nefndi það á síðasta ári að við værum að leita að stöðugleika með okkar unga lið og mér finnst við vera á góðri leið með það. Við áttum leikjahrinu á þessu ári þar sem við vorum taplausir í sex leikjum og það voru allt leikir í FIFA-gluggum. Það er kominn stöðugleiki með það hvaða leikmenn við erum með í hópnum og líka í okkar leik,“ segir Arnar.

„Við erum erum að vinna markvisst að því að búa til lið, skapa liðsheild, og erum komnir með góðan kjarna leikmanna og það er auðvitað frábært að geta svo byggt ofan á það með því að fá reynslumikla leikmenn inn í hópinn. Við fengum Aron Einar, Guðlaug Victor og Alfreð inn síðast. Núna geta Guðlaugur Victor og Alfreð ekki verið með vegna meiðsla, en í staðinn fáum við Sverri Inga og Jóhann Berg inn, báðir auðvitað mjög reynslumiklir leikmenn með mikil gæði.

Við erum bara mjög spenntir fyrir þessu móti setjum stefnuna á að vinna það,“ segir Arnar á vef KSÍ.