Telur ekkert lið geta stöðvað ÍBV

Eyjaliðið hefur verið á ótrúlegri siglingu seinni hluta tímabilsins og unnið hvern leikinn á fætur öðrum. Þá hefur liðið einnig tryggt sér deildar- og bikarmeistaratitilinn og Einar telur að það sé ekkert lið í deildinni um þessar mundir sem geti stöðvað ÍBV á leið liðsins að Íslandsmeistaratitlinum.

„Ég held að það sé ekkert lið að fara að stöðva þær,“ sagði Einar.

„Valur er að missa markmann núna sem er mjög slæmt fyrir Val. En ef ÍBV missir segjum bara Hrafnhildi Hönnu [Þrastardóttur], eða Sunnu [Jónsdóttur] eða Birnu [Berg Haraldsdóttur] - mega kannski síst við því að missa Hrafnhildi Hönnu - það sem skortir kannski hjá ÍBV er breidd.“

„Þær eru með virkilega gott sjö manna lið Alveg mjög gott. En þær mega illa við meiðslum og það er í rauninni held ég það eina sem gæti stöðvað ÍBV,“ bætti Einar við.

Hægt er að hlusta á þáttinn í heild sinni í spilaranum hér fyrir neðan, en umræðan um ÍBV hefst eftir um það bil 37 mínútur.