Arnar um landsliðsþjálfarastarfið: „Það verður allavega ekki Arnar Grétarsson”

Leikurinn fór 1-1 en Valur jafnaði á síðustu mínútu venjulegs leiktíma og því var gripið til vítaspyrnkukeppni þar sem Valur hafði betur; 2-3.

„Þetta var tiltölulega jafn leikur. Mér fannst KA svona ívið sterkari í leiknum. Lítið um einhver dauðafæri og meira um klafs og annað í vítateignum en við höfum oft verið betri á boltanum og skapað meira en ánægður með hvernig menn svöruðu markinu sem við fengum á okkur. Það kom svona smá líf í menn og náum að jafna og alltaf gaman að vinna titla þó að þetta gefi okkur ekkert nema smá sjálfstraust fyrir tímabilið.”

KA byrjaði leikinn betur fyrstu 10-15 mínúturnar og Valsliðið virtist vera nokkuð lengi í gang.

„Svona stundum þróast leikurinn og þeir voru bara grimmari en við fyrstu 10 mínúturnar og mér fannst það sama vera uppi á teningnum í seinni hálfleik svo vinnum við okkur inn í leikinn og verðum betri og leikurinn jafnast og við tökum hann yfir í smá tíma og svo koma þeir aftur inn. Mér fannst ekki vera mikið um opin færi, við fengum nokkrar góðar sóknir og þeir líka eitthvað svona klafs inn í teig þar sem þeir vildu fá víti og var eitthvað verið að tala um þetta hafi ekki verið víti sem þeir fá en það er bara eins og það er. Svona heilt yfir fótboltalega séð er ég ekki alveg nógu sáttur og ég á eftir að kíkja á það en gott samt að fara með sigurinn.”

Hólmar Örn Eyjólfsson fór af velli í hálfleik og Haukur Páll Sigurðsson kom inn í miðvörðinn í hans stað. Eru einhver meiðsli að plaga Hólmar?

„Hann var tæpur í nára þannig við vildum ekki vera taka neina sénsa. Mótið er bara að byrja í næstu viku þannig algjör óþarfi að vera taka einhverja sénsa. Við erum með fínan bekk og nóg af mönnum inn af bekk þannig það var bara skipting út af meiðslum.”

Ætla Valsmenn að bæta einhverjum leikmönnum við sig fyrir gluggalok?

„Það gæti alveg orðið þannig en við erum svolítið að skoða eins og með Kristófer Jónsson hvað gerist með hann, hvort að þeir kaupi hann úti, og ef að það verður á ég von á því að við bætum við okkur. Svo erum við að fá Orra Sigurð (Ómarsson) sem bætist í hópinn. Ég veit ekki nákvæmlega með Patrick Pedersen, hvenær hann verður klár, en það eru einhverjar 4-8 vikur geri ég rað fyrir. Við munum klárlega styrkjast þegar þessir leikmenn koma inn. Svo eru margir að spila sínar fyrstu mínútur, Tryggvi Hrafn hefur ekki spilað mikið og Andri Rúnar, þetta er svona fyrsti alvöru leikur hans í Valsbúningi þannig bara með hverri einustu viku verðum við sterkari.”

Arnar Grétarsson hefur verið nefndur í umræðunni um nýjan landsliðsþjálfara Íslands. Hefur einvher heyrt í honum varðandi stöðuna?

„Nei, ég er bara hrikalega ánægður á þeim stað sem ég er og landsliðsverkefni er ekkert á döfinni hvort sem það poppar upp eða ekki. Vonandi finna þeir bara fljótlega einhvern flottan kandídat sem getur tekið landsliðið áfram. Það verður allavega ekki Arnar Grétarsson.”

Að lokum var Arnar spurður hvort hann væri hér með að gefa það út að hann myndi ekki taka landsliðsþjálfarastarfið ef það myndi bjóðast?

„Nei, það er alveg klárt.”