Varað við grófu svindli vegna Messi-æðis í Kína

Messi er mættur til Kína vegna vináttulandsleiks Argentínu og Ástralíu sem fram fer á fimmtudaginn. Mikil eftirspurn er eftir miðum á leikinn en þeir voru seldir fyrir á bilinu 11.000 til 93.000 krónur, en hafa verið endurseldir á allt að 350.000 krónur.

Hins vegar er mikið meira um að óprúttnir aðilar reyni að hagnast á æðinu í kringum Messi, sem hefur unnið Gullboltann sjö sinnum og er ríkjandi heimsmeistari með Argentínu.

Til að mynda hafa þeir lofað að fólk megi hitta Messi fyrir andvirði um sex milljóna króna, og grínaðist lögreglan í Peking með þetta á samfélagsmiðlinum Weibo og skrifaði:

„Ef að það er hægt að svindla á þér fyrir 300.000 júan þá lyftum við bara glasi þér til heiðurs.“

Einnig hefur verið boðið upp á gervimiða á leikinn fyrir 100.000 krónur, VIP-pakka með áritraði treyju og mynd fyrir 150.000 krónur, og að fá Messi til að tala vel um eitthvað ákveðið fyrirtæki í beinni útsendingu fyrir tæplega milljarð króna, svo dæmi séu tekin.

Leikur Argentínu gegn Ástralíu verður fyrsti leikur Messi eftir að hann gekk í raðir bandaríska félagsins Inter Miami frá PSG á dögunum.