Neyddust til að sýna á sér píkuna á HM

Á mótinu var Miðbaugs-Gínea sökuð um að tefla fram liði með þremur leikmönnum sem ekki væru kvenkyns. Tvær af stjörnum liðsins voru sendar heim rétt fyrir mótið.

Í kjölfarið krafðist FIFA þess að allir leikmenn á mótinu myndu sanna kyn sitt, og segir Fischer að það hafi leikmenn Svíþjóðar þurft að gera með því að girða niður um sig fyrir framan lækni og kvenkyns sjúkraþjálfara, sem gengið hafi á milli hótelherbergja.

Héldu fyrst að um grín væri að ræða

„Ég skil hvað ég þarf að gera og dreg strax niður æfingabuxurnar og nærbuxurnar um leið. Sjúkraþjálfarinn kinkar kolli og segir „jamm“, og lítur svo á lækninn sem stendur í dyrunum. Þegar búið er að skoða alla leikmennina í liðinu okkar, það er að segja að þær höfðu sýnt á sér píkuna, gat landsliðslæknirinn okkar kvittað undir að það væru aðeins konur í kvennalandsliðinu okkar,“ skrifar Fischer í bók sína.

Fischer, sem er 38 ára, lagði skóna á hilluna í fyrra en hún lék hátt í 200 landsleiki fyrir Svíþjóð.

Fischer segir í samtali við SVT Sport að í fyrstu hafi leikmenn haldið að þetta væri eitthvað grín, en svo fengið áfall. Sér finnist það sem gerðist sjúklegra í hvert sinn sem hún hugsi til þess, og að það hljóti að vera til önnur leið. En talaði hún við sænska knattspyrnusambandið?

„Nei, ekki um að stöðva þetta. Skipunin var frá FIFA og ég kenni sænska sambandinu ekki um neitt, og tel ekki að það hafi höndlað þetta mál illa. Þau gerðu það sem þeim var skipað að gera.“

Vanalega nóg að haka í reit

Mats Börjesson var landsliðslæknir Svía á sínu fyrsta stórmóti á HM 2011 og staðfestir að FIFA hafi fyrirskipað skoðunina.

„Á öllum mótum staðfestum við að leikmennirnir séu kvenkyns með því að haka í reit, rétt eins og varðandi það að þeir séu ekki með neina hjartakvilla. Það að þessi krafa hafi komið allt í einu þetta ár, og meira þurft til en að haka í reit, var líklega vegna þess að það kom í ljós að einhverjir hefðu svindlað,“ sagði Börjesson við SVT og bætti við: „Maður skilur vel óánægju með þessi próf en mótshaldarinn vildi ekki valda neinum skaða.“