Ísraels­menn komnir inn á al Shifa-sjúkrahúsið

Samkvæmt heilbrigðisyfirvöldum á Gasa fengu þau aðeins nokkurra mínútna viðvörun áður en Ísraelsmenn létu til skarar skríða. Munir al-Bursh, framkvæmdastjóri heilbrigðisráðuneytisins, sagði aðgerðirnar virðast beinast að vesturhluta svæðisins og að miklar sprengingar hafi átt sér stað.

Sjúkrahússvæðið samanstendur af þyrpingu sex hæða bygginga og svæðum á milli þeirra. Al Shifa er stærsta sjúkrahúsið á Gasa, með rúm fyrir 600 til 900 sjúklinga og þar störfuðu þúsundir manns. Frá því að aðgerðir Ísraels hófust hafa þúsundir hafst við á svæðinu eftir að hafa flúið heimili sín.

Herinn umkringdi sjúkrahúsið á dögunum og frá þeim tíma hafa yfir 30 sjúklingar látist, að sögn heilbrigðisyfirvalda á Gasa. Samkvæmt upplýsingum Alþjóðaheilbrigðisstofnunarinnar liggja um 600 til 650 manns enn á sjúkrahúsinu, sem sinnt er af 200 til 500 heilbrigðisstarfsmönnum.

Þá eru 1.500 manns til viðbótar sagðir dvelja á svæðinu.

Ísraelsher segir höfuðstöðvar Hamas undir sjúkrahúsinu en þessu hafa bæði Hamas og starfsmenn á sjúkrahúsinu neitað. Ísraelar hafa hvatt fólk til að yfirgefa svæðið en fólk inni á sjúkrahúsinu segir það ekki óhætt, bæði vegna sprenginga og byssumanna sem skjóti á allt sem hreyfist.

Vitni hafa lýst því að skriðdrekar séu komnir inn á svæðið og hermenn inn á sjúkrahúsið. Erlendir miðlar hafa haft eftir heimildarmanni sem talar fyrir öryggisyfirvöld í Bandaríkjunum en vildi ekki láta nafns síns getið að Bandaríkjamenn vildu ekki sjá barist á spítalanum.