Segist gera ráð fyrir að á­tökin muni standa yfir út árið 2024

Frá þessu greindi Daniel Hagari, talsmaður hersins, í áramótaávarpi. 

Sagði hann að ákveðnar herdeildir, sérstaklega þær sem væru skipaðar varaliðum, yrðu dregnar til baka til að gera þeim kleift að enduskipuleggja sig fyrir áframhaldandi átök. Þau myndu líklega vara út árið.

Samkvæmt heilbrigðisyfirvöldum á Gasa, sem er stjórnað af Hamas, hafa tæplega 22 þúsund manns látist í árásum Ísraels og um 56 þúsund særst. 

Aðgerðir Ísraelsmanna hófust í kjölfar árása Hamas á byggðir í Ísrael 7. október síðastliðinn en herinn greindi frá því í gær að einn leiðtoga samtakanna, Adil Mismah, hefði látist í loftárásum á Deir al-Balah. Mismah var sagður hafa verið meðal þeirra sem skipulögðu árásirnar í október.

Stjórnvöld í Ísrael greindu frá því í gær að þau myndu grípa til varna fyrir Alþjóðaglæpadómstólnum eftir að Suður-Afríka biðlaði til dómstólsins í síðustu viku um að hefja rannsókn á meintu þjóðarmorði Ísraels á Palestínumönnum.

Samkvæmt dagblaðinu Haaretz var ákvörðunin um að verjast ásökununum í stað þess að hunsa þær tekin á fundi undir stjórn Benjamin Netanyahu forsætisráðherra, eftir samráð við öryggisráð landsins, herinn og dómsmálaráðuneytið.

Tzachi Hanegbi, ráðgjafi stjórnvalda í þjóðaröryggismálum, sagði stjórnvöld myndu verjast hinum fáránlegu ásökunum, sem mætti jafna við ásakanir fortíðar um að gyðingar fórnuðu kristnum til að nota blóð þeirra í trúarlegum athöfnum.