Fimm hand­teknir í tengslum við líkfund í Mojave-eyðimörkinni

Um var að ræða sex karlmenn sem höfðu verið skotnir til bana en einn þeirra virðist hafa hringt í neyðarnúmerið 911 áður en hann lést, sem varð til þess að líkin fundust við leit úr þyrlu.

Búið er að bera kennsl á fjóra af mönnunum sex.

Fjórir mannanna reyndust einnig hafa hlotið alvarlegan bruna en þess er ekki getið hvort það gerðist áður eða eftir að þeir voru skotnir. Fjögur líkanna fundust í þyrpingu nærri tveimur sundurskotnum bifreiðum. Eitt lík fannst inni í annarri bifreiðinni og annað skammt frá.

Lögregluyfirvöld í San Bernadino segist fullviss um að málið tengist viðskiptum með maríjúana en þrátt fyrir að kannabis hafi verið gert löglegt í Kaliforníu árið 2016 er enn umtalsverður svartur markaður með efnið til að forðast skattlagningu.

Lögregla telur víst að mennirnir fimm sem nú eru í haldi lögreglu hafi mætt til fundar við mennina sex og skotið þá til bana. Búið er að leggja hald á átta skotvopn, sem verða rannsökuð sem möguleg morðvopn.

Yfirvöld neituðu að svara því hvort atvikið tengdist gengjum eða fíkniefnahópum en sögðust telja um að ræða skipulagða glæpastarfsemi.